काठमाडौँ । गरिमा विकास बैंकको नाफामा सामान्य बढोत्तरी देखिएको छ । बैंकले सार्वजनिक गरेको चालु आर्थिक वर्षको पहिलो त्रैमाससम्मको अपरिष्कृत वित्तीय विवरण अनुसार बैंकको खुद नाफा ४.२५ प्रतिशतले बढेको हो । यस अवधिमा बैंकले २० करोड १५ लाख रुपैयाँ खुद नाफा आर्जन गरेको छ । गत आर्थिक वर्षको सोही अवधिसम्ममा भने बैंकले १९ करोड ३३ लाख रुपैयाँ खुद नाफा कमाएको थियो ।
त्यस्तै, समीक्षा अवधिमा बैंकको खुद ब्याज आम्दानी ११.५७ प्रतिशत बढेको छ भने खुद फि तथा कमिशन आम्दानी १९.९६ प्रतिशत बढेको छ । योसँगै बैंको कुल सञ्चालन आम्दानी १२.२९ प्रतिशत र सञ्चालन मुनाफा ४.३२ प्रतिशत बढेको छ । यस्तै, चालु आर्थिक वर्षको अन्त्यसम्ममा बैंकको वितरणयोग्य मुनाफा ३८ करोड ६८ लाख रुपैयाँ रहेको छ भने प्रतिशेयर वितरणयोग्य मुनाफा ७ रुपैयाँ ४६ पैसा रहेको छ ।
नाफासँगै चालु आर्थिक वर्षको पहिलो त्रैमासमा बैंकको प्रतिशेयर आम्दानी (ईपीएस) पनि बढेको छ । यस अवधिमा बैंकको ईपीएस ६३ पैसा बढेर १५ रुपैयाँ ५४ पैसा पुगेको छ । असोज मसान्तसम्ममा बैंकको मूल्य आम्दानी अनुपात २३.४९ गुणा रहेको छ भने प्रतिशेयर नेटवर्थ १५२ रुपैयाँ ७१ पैसा रहेको छ ।
५ अर्ब १८ करोड ७६ लाख रुपैयाँ चुक्ता पूँजी रहेको यस बैंकको जगेडा कोषमा २ अर्ब ७३ करोड ४३ लाख रुपैयाँ सञ्चित छ । पछिल्लो तीन महिनामा बैंकको निक्षेप १.८२ प्रतिशत बढेको छ भने कर्जा १.२८ प्रतिशत बढेको छ ।
