काठमाडौँ । व्यवसायी दुर्गा प्रसाईंलाई अघोषित नजरबन्दमा राखिएको छ । शुक्रबार प्रसाईंको घरमा ठूलो संख्यामा प्रहरी परिचालन गर्दै सरकारले प्रसाईंलाई नजरबन्दमा राखिएको प्रसाईंका समर्थकहरुले दाबी गरेका हुन् । उनीहरुका अनुसार अहिले पनि प्रसाईंको निवासमा प्रहरी तथा सशस्त्र प्रहरीको टोली परिचालन गरेको छ ।

प्रसाईंले बिहीबार बल्खुको प्रदर्शनपछि शुक्रबार तिनकुनेमा कार्यक्रमको घोषणा गरेपछि सरकारले प्रसाईंलाई ‘अघोषित नजरबन्दमा’ राखेको प्रसाईंका समर्थकले बताएका छन् । 

यता प्रसाईं सत्य कुरा बोल्दा सरकारले आफूलाई नजरबन्दमा राखेको बताएका छन् । पत्रकार सम्मेलनको आयोजना गर्दै प्रसाईंले आफूलाई अघोषित रुपमा नजरबन्दमा राखे पनि आन्दोलनका कार्यक्रम नरोकिने दाबी गरेका छन् । 

अहिले प्रसाईंको निवासमा सरकारले ठूलो संख्यामा प्रहरी परिचालन गरेको छ । उनलाई घरबाट बाहिर निस्किन नदिने गरी तयारी गरिएको प्रसाईंका समर्थकले बताएका छन् ।