काठमाडौँ । टिकटक प्रतिबन्ध गर्ने सरकारी निर्णयविरुद्ध सर्वोच्च अदालतमा परेको मुद्दा ‘हेर्न नभ्याइने’मा परेको छ । न्यायाधीश डा. कुमार चुडालको एकल इजलासमा परेको उक्त मुद्दा सुनुवाई सोमबार हेर्न नभ्याइनेमा परेको हो । चुडालको इजलासमा टिकटक प्रतिबन्धविरुद्ध १० वटा मुद्धा पेसीमा चढेको थियो ।
सोमबार टिकटक प्रतिबन्धविरुद्धको मुद्धा ‘हेर्न नभ्याइने’मा परेपछि अब उक्त मुद्धाको अर्को पेशी मंगलबार तोकिएको छ ।
त्यस्तै, मंगलबार टिकटक प्रतिबन्धबारे अदालतमा थप दुईवटा मुद्दा दर्ता भएको छ ।
यसअघि सरकारले कात्तिक २७ गते सामाजिक सद्भाव बिगारेको, अश्लिलता बढाएको र विकृति फैलाएको भन्दै टिकटक माथि प्रतिबन्ध लगाएको थियो । तिहार बिदा सकिएसँगै शुक्रबार टिकटक प्रतिबन्धविरुद्ध अदालतमा १० वटा मुद्दा दर्ता भएका थिए ।
