काठमाडौँ । कागजी कानुन हेर्ने हो भने नेपालमा देह व्यापार पूर्ण रुपमा बन्देज छ । अर्थात कहींकतै कुनै बहानामा पनि देह व्यापार गर्न पाइन्न । तर ओपन सेक्रेटचाहिं के हो भने नेपालमा त्यस्ता शहरहरु छैनन्, जहाँ देह व्यापारको सेक्रेट जक्सन नहोस् । अझ काठमाडौँ, पोखरा, बुटवल, जस्ता शहरहरुमा त प्रहरीकै अगाडि खुलेआम शरीरको मोलतोल हुन्छ, शरीर सुखको खुलेआम व्यापार हुन्छ अनि चलिरहेछ देहव्यापारको धन्दा । पुलिसलाई पैसा आएकै छ, किन कानुनको पालना गर्थे र, देह व्यापार गर्नेहरु कि विकल्प देउ, कि मेरो शरीर मेरो मर्जी भनिरहेका छन्, जसको जवाफ र विकल्प दुवै छैन सरकारसँग । अनि थोरै रहरले, धेरै बाध्यताले खुलमखुला चलिरहेछ, मान्छेले मान्छेलाई किनबेच गर्ने शरीरको व्यापार शहरहरुमा ।
रात छिप्पिँदै गर्दा देशका प्रमुख शहरहरुमा थरीथरीका देह व्यापार चल्छन् । एकथरिले पुलमुनि वा आकाशे पुलमाथि डिल गर्छन् । खुलेआम रुपमा रातको रेट तोकिन्छ, वा समय तोकेर पैसाको छिनोफानो हुन्छ । कति व्यापार गेष्ट हाउस वा होटलहरुका नाममा चल्छ, उनीहरुकै ठाउँमा चल्छ । जहाँ जवानीको मोल तोक्ने दलालहरु चिटिक्क परेका कपडामा देखिन्छन् । देशको प्रहरी प्रशासन उनीहरुकै खल्तीमा हुन्छ। अझ पर्यटकीय नगरीहरुमा त झन् देह व्यापार ओपन सेक्रेटजस्तै छ । कतिपय ठाउँमा प्रहरीले हप्ता असुल्छन्, र व्यापार चल्छ । कति ठाउँमा प्रशासन चलाउनेहरुले गोजी भर्छन् र देह व्यापार चल्छ । कतिपय ठाउँमा विचरा यिनीहरुसँग अरु के छ र बेच्नलाई, न सरकारले रोजगार दिएको छ, न विकल्प भन्ने लागेर प्रहरी र प्रशासन दुवैले आँखा चिम्लिदिएका छन्, जसका कारण फस्टाईरहेको छ शरीरको व्यापार, शहरहरुमा ।
यतिसम्म त चलेकै थियो, काठमाडौँका गेष्ट हाउसहरुमा घन्टे कोठाहरु बिक्री भइनै रहेका छन्, रिसोर्टका नाममा होस् वा भट्टी, शरीरको मोलतोलको ओपन सेक्रेट बिजनेश आफ्नै गतिमा थियो र छ, तर पछिल्ला केही घटनाहरुले अव यो अवैध भनिएको बिजनेशभित्र पनि कहालीलाग्दा घटना छन् भन्ने देखिएको छ, जसले देखाउँछ, यो समाजको विकृत तस्विर । सँगै देखाउँछ केही काम नपाएकै कारण पापी पेट पाल्न काम गर्नेहरुको असुरक्षाको स्थिति ।
विश्वका धेरै देशहरुमा देह व्यापारलाई मनोरञ्जनको एउटा क्षेत्र मानिएको छ । सरकारले निश्चित ठाउँ तोकिदिएर त्यहाँ देह व्यापार गर्न दिन्छ । राज्यले मोटो कर असुल्छ र भरपुर सुरक्षा पनि दिन्छ । विश्वमा त्यस्ता धेरै वालस्ट्रिटहरु छन्, जसले व्यापारको अपार साम्राज्य बनाएका छन् । त्यहाँ जवानीको मात्र होइन, पैसाको खोलो बग्छ । न जानेहरुलाई कसैको डर छ, न आउनेहरुलाई । बरु राज्यले दुवैको अधिकार संरक्षण गर्छ । अझ थाईल्याण्डजस्ता देशले त झन्, देह व्यापारबाट देशकै कुल ग्राहस्थ उत्पादनको ठुलो हिस्सा ओगट्छ । नेपाल, त्यस्तै हुनुपर्छ भनेको पक्कै होइन, तर खुलेआम हुने यस्ता धन्दा कि उनीहरुलाई विकल्प दिएर बन्द गर्न सक्नुपर्छ, होइन भने व्यवस्थित गर्न सक्नुपर्छ । हुन त नियमन गर्न सकिएन भनेर टिकटक त बन्द गर्ने सरकारले अवैध धन्दा व्यवस्थित गरेर चलाउन सक्छ भन्ने ठाउँ छैन, तर नसक्नेले नसके सक्नेलाई सत्ता सुम्पनुपर्छ । यस्ता त धन्दा चलिरहेछ, बस प्रशासनलाई भत्ता सुम्पनुपर्छ ।
हुन त नेपालमा देह व्यापार गैरकानुनी हुँदा राज्यले बाहेक सबैले कमाएका छन् । पुलिसले हप्ते असुलीबाट कमाएका छन्, दलालले अरुको शरीरको दलाली गरेर कमाएका छन्, धन्दा गर्नेले यसै कमाएका छन्, गेष्ट हाउस चलाउनेले यसै कमाएका छन्, प्रहरी र धन्दावाल मिलाउने दलालहरुले पनि कमाएकै छन् । कमाएको छैन त मात्र राज्यले । र त न सरकार सँग यो व्यवसायलाई व्यवस्थित गर्ने तागत, वा औकात छ, न आँट । अनि यहि कारण, देह व्यापार भनेर होइन, कतै खाजा घर भनेर त कतै मसाज सेन्टरका नाममा खुलेआम भईरहेछ शरीरको व्यापार ।
पछिल्ला केहि उदाहरण हेरौं । त्रिभुवन अन्तर्राष्ट्रिय विमानस्थल नजिकै शम्भुमार्ग र रातोपुलस्थित दुईवटा मसाज सेन्टरका सञ्चालक हुन् सङ्खुवासभाका दिनेश पौडेल । काठमाडौँ महानगरपालिका–९ स्थित शम्भुमार्गमा सञ्चालित नुवाकोट स्पा एन्ड ट्रेनिङ सेन्टर र रातोपुलस्थित नुवाकोट स्पा एन्ड ब्युटी पार्लरको आवरणमा देह व्यापार गरेको आरोपमा उनी अहिले पक्राउ परेका छन् । केही समय अगाडि प्रहरीले उनको पार्लरमा छापा हानेको थियो । त्यहाँ केही नाबालिग र दुई युवतीहरुलाई प्रहरीले उसकै भाषामा उद्धार गरेको थियो । ग्रामीण भेगका आर्थिक अवस्था कमजोर भएका र पढलेख नभएका किशोरीहरूलाई ब्युटी पार्लर र मसाज सम्बन्धी काम लगाउने भन्दै काठमाडौँ ल्याउने र मसाज सिकाएर पछी देह व्यापारमा लगाउने गरेको प्रहरीको प्रारम्भिक निष्कर्ष छ । उद्धार गरिएका किशोरी र नाबालिगको उजुरीका आधारमा पक्राउ गरेर पौडेलविरुद्ध मानव बेचबिखन तथा ओसारपसार मुद्दामा अनुसन्धान भइरहेको छ । किशोरीहरुलाई केही सय कमिसन दिने र ग्राहकबाट असुलेको थप रकम आफूले लिने गरेको आरोप छ उनलाई । उद्धार गरिएका किशोरीहरु ८ र ९ कक्षामा अध्ययनरत छन् । सुरुमा फकाएर काममा लगाउने र पछि ग्राहकलाई शरीर सुख नदिए पुरुषसँग अश्लील क्रियाकलाप गरेको फोटो, भिडियो मसँग छ, नमानेमा सामाजिक सञ्जालमार्फत आफन्तलाई पठाउँछु’ भनेर त्रासमा राख्ने गरेको पीडितहरूले प्रहरीलाई बताएका छन् ।
अव अर्को उदाहरण हेरौं । काठमाडौँस्थित कलङ्की र नयाँ बसपार्कमा रहेका गेस्ट हाउसमा पनि देह व्यापार भएको प्रहरीले फेला पारेको छ । प्रहरीको मानव बेचबिखन ब्युरोले जबर्जस्ती यौनधन्दामा लगाइएका तीन जना नाबालिगहरूलाई उद्धार गरेको छ । कलङ्की र नयाँ बसपार्कबाट तीन जना नाबालिगहरूलाई उद्धार गरिएको छ । कलङ्की र नयाँ बसपार्कको गेस्ट हाउसमा राखेर ती नाबालिगहरूलाई जबरजस्ती देहव्यापारमा लगाउने गरेको पाइएको छ । काठमाडौँमा मात्र होइन देशभर यस्ता घटना दिनदिनै बढिरहेका छन् ।
अव यीनै घटनामा हेरौं, राज्यले नियमन गर्न सकेको भए यस्ता घटनामा उमेर पुगेकाहरु मात्र हुन्थे, राज्यको उपस्थिति हुने भएपछि त्यहाँ सेटिङ चाहिन्नथ्यो । उल्टै प्रहरीले सुरक्षा दिन सक्थ्यो । परिणाम, उमेर नपुगेकाहरु सोषणमा पर्नुपर्ने स्थिति हुँदैनथ्यो । देह व्यापारका छुट्टै अखडाहरुमा मात्र यस्तो कारोबार हुन्थ्यो, अरु ठाउँमा असुरक्षाको तनाव हुने थिएन । देह व्यापार भनेपछि देह व्यापारकै रुपमा काम हुन्थ्यो । तर यहाँ त स्पा, मसाज, ब्युटी पार्लर लगायतका बहानामा नेपाली चेलीहरु शोषित छन् । दलालहरुले उनीहरुले शरीर गुमाएर कमाएको पैसामा राज चलाएका छन्, अनि राज्यले पाउने केही छैन ।
राज्यले सकेसम्म रोजगारी दिनुपर्छ । सकेसम्म विकल्प दिनुपर्छ । विकल्प भए यस्तो पेशामा लाग्ने रहर खासै कसैलाई हुन्न । तर केहि विकल्प नभएपछी गरेको काम पनि खुलेआम घुस खुवाएर गर्नुपर्ने स्थिति छ, चरम शोषणको स्थिति छ । कतै कतै मात्र होइन, काठमाडौँका गल्लीगल्लीमा चोकचोकमा, पुलमाथि, पुलमुनि, खोला तल, झाडीभित्र अनेक ठाउँमा यस्ता धन्दा चलिरहेका छन् । काठमाडौँका अधिकांश गेष्ट हाउसमा, होटलहरुमा यस्तो अबैधमानिएको धन्दा चलिरहेको छ । परिणाम, राज्यले केहि पाएको छैन, र असुरक्षा र अपराध बढेको छ ।
पैसा तिर्ने तिर्न तयार छ । शरीर सुम्पने यसै तयार छन् । विकल्प नभएपछि धेरैको बाध्यता छ, केहीको रहर पनि होला । तर कुनै पनि कुरा नियन्त्रण गर्न खोजे त्यसले दुर्घटना निम्त्याउँछ । त्यसैले सरकारले बुझ्नुपर्छ, उमेर पुगेकाहरुलाई शरीरसुखको उन्मादका नाममा मनपरी वा अपराध गर्न होइन, नियमनको दायराभित्र ल्याएर अव देह व्यापारलाई करको दायराभित्र ल्याउन ढिलो गर्नु हुन्न । घरमा जति टाइट वातावरण हुन्छ, केटाकेटी त्यसैगरी बिग्रिन्छन्, आखिर देश पनि उस्तै हो नि होइन र । फेरी पनि भन्छौँ, सकेसम्म विकल्प देउ, केही काम नपाएर आफ्नै शरीर बेच्न तयार भएका चेलीहरुलाई । विकल्प दिन नसके व्यवस्था गरिदेउ, जहाँ उनीहरु लुटिनुपर्दैन । बरु राज्यलाई कर तिरेर आफ्नो पेट पाल्छन् । अनि नाबालिगहरुलाई प्रयोग गर्नेहरुलाई त अझ कडा कानुन बनाउ, बरु झुन्ड्याउने कानुन बनाउ । अरे, हरेक कुरामा विदेशको उदाहरण दिने नेताहरु नियमनका विषयमा पनि त सोच, विदेशबाट सिक न । होइन र ? (भिडियो)
