काठमाडौँ । कैलालीमा एउटा सिंगै गाउ एक महिलाबाटै लुटिएको पाइएको छ । कैलालीको गोदवारी नगरपालिका–९ स्थित बल्मी गाउँ एक महिलाबाटै लुटिएको पाइएको हो ।
स्थानीयका अनुसार केही दिनअघि मात्रै गाउँमा देखिएकी ती महिलाले बल्मी गाउँका करिब २० भन्दा धेरै घरका महिलाहरुलाई एकैसाथ लुटेकी हुन् । उनले विभिन्न घरबाट सुन, चाँदी, नगद र काँस, पित्तल तथा तामाका लाखौँ मूल्य बराबरका भाँडाकुँडा लुटेकी हुन् ।
करिब चारपाँच दिनअघि मात्रै काखमा बच्चा च्यापेर बल्मी गाउँमा आएकी ती महिलाले स्थानीय महिलाहरुलाई विभिन्न प्रलोभन देखाउने गर्थिन् । उनले खासगरी पुरुष नभएको मौका छोपेर घरमै बस्ने महिलाहरुलाई प्रलोभनमा पार्ने गरेको स्थानीय महिलाहरुको भनाई छ । ‘ती महिलाको नाम, ठेगाना हामीलाई केही थाहा छैन । उनी आउँथिन् र पैसा तथा विभिन्न सामान दिए भोलिपल्ट त्यसको डबल फिर्ता दिने भन्थिन् र केही दिन हामीले दिएको पैसा अर्को दिन डबल गरेर फिर्ता पनि गरिन् ।’, एक स्थानीय महिलाले भनिन्, ‘पछि विश्वास गरेर हामीले सुन, चाँदीका गहना र भाँडाकुँडा दियौँ । तर, अहिले ती महिला फरार छिन् ।’
काखमा बच्चा च्यापेर हिँड्ने ती महिलाले पुरुष नभएको घरमा छानीछानी जाने र महिलाहरुलाई लुट्ने गरेको स्थानीयहरुले बताएका छन् ।
नाम, ठेगाना नखुलेकी ती महिलाले स्थानीय महिलाहरुबाट डबल गरिदिने भन्दै सुन, चाँदीका गहना तथा भाँडाकुँडाहरु लिने गर्थिन् । सुरुसुरुमा पुराना भाँडा लिएर नयाँ भाँडा दिँदै ती महिलाले स्थानीय महिलाहरुको विश्वास जितेकी थिइन् । पछि घरमा पुरुष नभएको मौका छोपेर उनले एकको दुई भन्दै पैसा, सुन, चाँदी, भाँडाकुडा लिएर अहिले फरार भएकी छिन् ।
स्थानीयका अनुसार ती महिलाले २० घरबाट १५ देखि २० तोला सुन, चाँदीका गहना, तामा, पित्तल र काँसका भाँडाकुडा र पैसा लिएर फरार भएकी छिन् । हाल हुलियाका आधारमा ती महिलाको खोजीकार्य भइरहेको प्रहरीले जनाएको छ ।
