काठमाडौँ । नेपाल चेम्बर अफ कमर्सका अध्यक्ष राजेन्द्र मल्लले सुर्तिजन्य पदार्थ माथिको प्रतिबन्धले व्यवसायी मर्कामा परेको बताएका छन् । उनले काठमाडौँ महानगरपालिकाले सुर्तीजन्य पदार्थको बिक्री वितरणमा प्रतिबन्ध लगाएपछि साना व्यवसायी मारमा परेको बताएका हुन् ।
महानगरभित्र सार्वजनिक स्थलमा सुर्तिजन्य पदार्थ र धुम्रपान सेवन गर्न रोक लगाउने कुरा स्वागतयोग्य भएपनि कारोबार नै गर्न नदिने कुराले साना व्यवसायीहरु मारमा पर्ने मल्लको भनाई छ ।
‘सार्वजनिक स्थलमा सुर्तिजन्य पदार्थ र धूम्रपान सेवन गर्न नहुने कुरा स्वागतयोग्य छ ।’, उनले भने, ‘तर कारोबार नै गर्न नदिने कुराले चाहिँ साना व्यवसायीलाई मार पर्छ । सार्वजनिक स्थलमा सेवन निषेध गरे पनि कारोबारलाई भने बन्द गरिनु हुँदैन ।’
काठमाडौं महानगपालिकाले मंसिर २८ गतेदेखि महानगरभित्र सुर्तिजन्य पदार्थ बिक्री वितरणमा पूर्ण प्रतिबन्ध लगाएको छ । यसका लागि महानगरले सहरका मुख्य चोकहरुमा ५० जना नगर प्रहरी समेत परिचालन गरेको छ । महानगरले आफ्नो क्षेत्रभित्रका पसलको अनुगमन गर्दा सुर्तीजन्य पदार्थ भेटिएमा दुई पटकसम्म जफत गर्ने र तेस्रो पटकमा पसल नै बन्द गरिने चेतावनी दिएको छ । त्यस्तै, सार्वजनिक स्थलको १ सय मिटर वरपर बसेर धूम्रपान गरेको भेटिए एक सय रुपैयाँ जरिवाना गर्ने जनाएको छ ।
