काठमाडौँ । नियामक नेपाल धितोपत्र बोर्डबाट उद्योग वाणिज्य महासंघको प्रतिनिधि हटाउने तयारी गरिएको छ । स्वार्थको द्वन्द बढेपछि धितोपत्रसम्बन्धी ऐन २०६३ मा संशोधन गर्दै बोर्डको सञ्चालक समितिबाट महासंघको प्रतिनिधि हटाउने तयारी गरिएको हो ।

बोर्डबाट महासंघको प्रतिनिधि हटाउने गरी ऐन संशोधनको मस्यौदा समेत तयार पारिएको छ ।

बोर्ड स्रोतका अनुसार ऐन संशोधनको मस्यौदामा अर्थ मन्त्रालयले समेत सहमति दिएको छ । अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखामा भएको छलफलपछि बोर्डबाट महासंघको प्रतिनिधि हटाउने विषयमा अर्थ मन्त्रालयले पनि सहमति दिएको हो ।

बोर्डले यसअघि महासंघको प्रतिनिधिलाई बोर्डको सञ्चालक समिति सदस्य बनाउँदा स्वार्थको द्वन्द हुने भन्दै बोर्डबाट महासंघको प्रतिनिधि हटाउने प्रस्ताव गरेको थियो । सोही प्रस्ताव अनुसार हाल बोर्डबाट महासंघको प्रतिनिधि हटाउने तयारी गरिएको हो ।

पछिल्ला दिन निजी क्षेत्रले सेयर निष्कासन गर्ने क्रम बढिरहेको र महासंघबाट बोर्डमा जाने अधिकांश प्रतिनिधि सूचीकृत कम्पनीका सञ्चालक हुने भएकाले पनि स्वार्थको द्वन्द हुने भन्दै बोर्डको सञ्चालक समितिबाट महासंघको प्रतिनिधि हटाउने गरी ऐन संशोधनको मस्यौदा बनाइएको हो ।