">
काठमाडौँ । त्रिभुवन अन्तराष्ट्रिय विमानस्थलबाट साढे ६ किलो सुनसहित विदेशी नागरिक पक्राउ परेका छन् । प्रहरीले अवैध सुनसहित इजिप्टका नागरिक सरिफ मोहमद लासिमलाई पक्राउ गरेको हो ।
उनलाई विमानस्थलबाट बाहिरिसकेपछि पक्राउ गरिएको त्रिभुवन विमानस्थल सुरक्षा प्रहरी कार्यालयका प्रमुख डिआईजी अर्जुन चन्दले जानकारी दिएका छन् । उनको साथबाट अवैधमा रुपमा तस्करी गरिएको साढे ६ किलो सुन पनि बरामद गरिएको छ ।
पक्राउ परेका इजिप्टका नागरिक फ्लाई दुबई एफजेड ५७३ विमानमार्फत नेपाल आएका थिए । साढे ६ किलो सुनसहित नेपाल आएका ती व्यक्ति भन्सारबाट पास भइ विमानस्थलबाट बाहिरिसकेको थिए । तर, शंकास्पद लागेपछि चेकजाँच गर्ने क्रममा उनको साथमा अर्ध ठोस अवस्थामा रहेको सुन फेला पारेको हो । उनले उक्त सुन ज्याकेटभित्र राखेर ल्याएका थिए ।
यसअघि १४ किलो सुनसहित पक्राउ परेका गोरखामा चन्द्र घले पनि सोही विमानमार्फत नेपाल आएका थिए ।
प्रहरीको प्रारम्भिक अनुसन्धानबाट यसरी तस्करी गरिएको सुन भारततर्फ लैजाने तयारी रहेको बुझिएको छ । पक्राउ परेका इजिप्टका नागरिकसँगै प्रहरीले थप दुई जना सुडानी नागरिकलाई पनि संलग्नताको आशंकामा पक्राउ गरेको छ । हाल उक्त घटनाको थप अनुसन्धान भइरहेको प्रहरीले जनाएको छ ।
