काठमाडौँ । विराटनगर महानगरपालिकाले नेपाल विद्युत प्राधिकरणलाई पोल भाडा र सम्पत्ति कर तिर्न ताकेता गरेको छ । महानगरले एक सूचना जारी गर्दै प्राधिकरणले सम्पत्ति कर र बिजुलीको पोलको भाडा तिर्न ताकेता गरेको हो । प्राधिकरणले सडक बत्तीको भाडा तिर्न महानगरलाई ताकेता गरेपछि महानगरले प्राधिकरणलाई पनि सम्पत्ति कर र पोल भाडा तिर्न ताकेता गरेको बुझिएको छ ।
यसअघि प्राधिकरणले सडक बत्तीको बक्यौता नतिरेको भन्दै महानगरका तीन वडाका सडक बत्तीको लाइन काटेको थियो । एक्कासी सडक बत्तीको लाइन काटेपछि आफूहरुले पनि उठ्न बाँकी रहेको रकम असुलीका लागि पहल गरको महानगरले जनाएको छ ।
महानगले प्राधिकरणसँग बिजुलीको पोलको भाडा र इन्टरनेट सेवा प्रदायकलाई दिएबापत भएको आम्दानीको १० प्रतिशत बहाल कर तिर्न पनि ताकेता गरेको छ ।
प्राधिकरणका अनुसार महानगरले सडक बत्तीको मात्रै ८ करोड ६६ लाख ८ हजार ७ सय ७ रुपैयाँ तिर्न बाँकी छ । उक्त बक्यौता तिर्नका लागि प्राधिकरणले असोज २१ गते गारखापत्रमा ४५ दिने सूचनासमेत निकालेको थियो ।
यता महानगरले भने प्राधिकरणले सम्पत्ति करबापतको ३ करोड ८१ लाख ८५ हजार ७ सय ३३ रुपैयाँ र २३ हजार १ सय ५१ बिजुलीको पोलको भाडा ६ करोड १९ लाख २८ हजार ९ सय २५ रुपैयाँ गरी कुल १० करोड १ लाख १४ हजार ६ सय ५८ रुपैयाँ कर तिर्न बाँकी रहेको जनाएको छ । महानगरले प्राधिकरणको नाममा पत्र लेख्दै उक्त रकम चुक्ता गर्न ताकेता गरेको छ ।
हाल उक्त समस्या समाधानका लागि दुवै पक्षबीच छलफल भइरहेको छ ।
