काठमाडौँ । नेपाली काँग्रेस निकट व्यक्ति सीइओ भएर आएपछि नेपाल बैंक लिमिटेडले स्वर्गीय सुबासचन्द्र नेम्वाङसमेतको नाममा हठात लिलामीको सूचना निकालेको भन्दै बैंकका सीइओ तिलक राज पाण्डेयको चौतर्फी विरोध सुरु भएको छ । पाम फुड्स एण्ड वेभरेज टेक्नोलोजी प्रालिले पूर्वसभामुख स्व.सुवासचन्द्र नेम्वाङको जग्गा धितो राखेर लिएको ऋण चुक्ता नभएको भन्दै लिलामीको सूचना निकालेको थियो ।
‘कतिपय ठाउँमा अरवौंको ऋण फसेको छ, जुन ऋण उठाउन सीइओलाई मतलव छैन । तर एक करोड ५० लाख रुपैयाँ साँवा र ब्याज करिब ८० लाख रुपैयाँ तिर्न बाँकी फाइललाई प्राथमिकता दिनु, ऋण तिर्छु भन्दाभन्दै पनि प्रक्रियामा जानु र निधन भईसकेका देशका निष्ठावान् नेताको नाम जोडेर पीडीत परिवारलाई थप पीडा दिनुले सीइओको नियतमा प्रश्न उठाउने ठाउँ छ।’ बैंकका अर्का एक उच्च अधिकारीले अर्थ सरोकारसँग भने, ‘यो काम थाहा नपाएर भएको पनि होइन । सीइओ सापको विशेष चासो किन थियो भन्ने बल्ल बुझिदैछ ।’यता बैंकका सिइओ तिलक राज पाण्डेयले भने आफुले राजनीतिक प्रतिशोध नराखेको, बरु सो प्रक्रिया स्वाभाविक रहेको दाबी गरेका छन् । ‘सुबास नेम्वाङको निधन भएपछि सो ऋण त जसले अंश खाने हो, उसले तिर्नुपर्यो नि। छोराहरुले तिर्छन् नि ।’ अर्थ सरोकारसँग कुराकानी गर्दै सीइओ पाण्डेयले भने, ‘बाँकी त यो सव स्वाभाविक प्रक्रिया हो ।’
बैंकले सूचना निकालेपछि नेम्वाङ परिवार भने तनावमा छ ।
