काठमाडौँ । माइक्रोसफ्ट विश्वकै सबैभन्दा मूल्यवान कम्पनी बनेको छ । संसारकै सबैभन्दा ठूलो प्रविधि कम्पनी एप्ललाई पछि पार्दै माइक्रोसफ्ट सबैभन्दा मूल्यवान कम्पनीको सूचीमा पहिलो स्थानमा पुगेको हो । योसँगै यसअघि सबैभन्दा मूल्यवान कम्पनीको सूचीमा पहिलो स्थानमा रहेको एप्पल दोस्रो स्थानमा झरेको छ ।
अन्तराष्ट्रिय सञ्चारमाध्यमका अनुसार आइफोनको मागमा देखिएको गिरावटका कारण एप्पलको सेयर मूल्यमा गिरावट आएको हो । अहिले एप्पलको बजार मूल्य २.८७१ ट्रिलियन डलर रहेको छ ।
जबकी सोही अवधिमा माइक्रोसफ्टको बजार मूल्य २.८७५ ट्रिलियन डलर पुगेको छ ।
सन् २०२३ मा ओपन एआई कम्पनीसँगको सहकार्यमा एआई प्रविधियुक्त टुल्स च्याट जिपिटी ल्याएसँगै माइक्रोसफ्टको सेयर मूल्यमा आक्रामक वृद्धि भएको हो । यही कारण एप्पललाई समेत पछि पार्दै माइक्रोसफ्ट विश्वकै सबैभन्दा मूल्यवान कम्पनी बन्न पुगेको हो ।
