काठमाडौँ । एनआईसी एशिया बैंकले माघ महिनाको लागि ब्याजदर थप घटाएको छ । बैंकले पुष महिनाको तुलनामा माघको लागि ब्याजदर घटाएको हो । बैंकले घटाएको ब्याजदर माघ १ गतेदेखि लागू हुनेछ ।

योसँगै अब एनआईसी एशिया बैंकले माघ महिनामा मुद्दती निक्षेपमा अधिकतम ८.०६५ प्रतिशत र संस्थागत मुद्दती निक्षेपमा ६.०६५ प्रतिशत ब्याज दिने भएको छ ।

यसअघि बैंकले व्यक्तिगत निक्षेपमा अधिकतम ८.६७ प्रतिशत र संस्थागततर्फ ६.६७ प्रतिशत ब्याज दिँदै आएको थियो । तर, बैंकले माघमा मुद्दती निक्षेपको ब्याज घटाए पनि कर्जाको ब्याजदरमा भने कुनै परिवर्तन गरेको छैन ।

पछिल्लो समय बैंकिङ प्रणालीमा निक्षेपको तुलनामा कर्जा लगानी साह्रै न्यून भएपछि बैंकहरुले पछिल्लो तीन महिनायता ब्याजदर घटाइरहेका छन् । हाल एनआईसी एशियासँगै अन्य बैंकहरुले पनि निक्षेपको ब्याज घटाउने तयारी गरेका छन् ।