काठमाडौँ । चालु आर्थिक वर्षको दोस्रो त्रैमासमा एनआईसी एशिया बैंकको नाफा घटेको छ । बैंकले सार्वजनिक गरेको अपष्किृत वित्तीय विवरणअनुसार चालु आर्थिक वर्षको ६ महिनामा बैंकको नाफा ४१.८४ प्रतिशतले घटेको हो । यसअवधिमा बैंकले कुल १ अर्ब ९० करोड ३८ लाख रुपैयाँ खुद नाफा आर्जन गरेको छ । बैंकले गत आर्थिक वर्षको सोही अवधिमा ३ अर्ब २७ करोड खुद नाफा आर्जन गरेको थियो ।
त्यस्तै, बैंकको खुद ब्याज आम्दानी १०.१३ प्रतिशतले घटेको छ भने खुद फि तथा कमिसन आम्दानी १६.३५ प्रतिशतले बढेको छ । समीक्षा अवधिमा बैंकको कुल सञ्चालन आम्दानी ४.९६ प्रतिशत र सञ्चालन मुनाफा २४.१३ प्रतिशतले घटेको छ । यस अवधिमा बैंकको खराब कर्जा ०.६१ प्रतिशतबाट बढेर १.१९ प्रतिशत पुगेको छ । त्यस्तै, यस अवधिमा बैंकको इम्पेयरमेन्ट चार्ज ४८ करोड धनात्मक रहेको छ ।
समीक्षा अवधिमा बैंकको नाफासँगै प्रतिसेयर आम्दानी (ईपीएस) पनि घटेको छ । यसअवधिमा बैंकको ईपीएस ३१ रुपैयाँ ९ पैसाले घटेर २५ रुपैयाँ ५२ पैसामा सिमित भएको छ ।
त्यस्तै, यस अवधिमा बैंकको मूल्य आम्दानी अनुपात १९.९७ गुण रहेको छ भने प्रतिसेयर नेटवर्थ २०५ रुपैयाँ १० पैसा रहेको छ । हाल बैंकको जगेडा कोषमा १५ अर्ब ६७ करोड ८३ लाख रुपैयाँ सञ्चित रहेको छ । समीक्षा अवधिमा बैंकको वितरणयोग्य मुनाफा ५९ करोड २२ लाख रुपैयाँ ऋणात्मक रहेको छ ।
