काठमाडौँ । जब नयाँ मान्छेले राजनीतिमा कमाल गर्छ, वा गर्न खोज्छ, जनताको मतको बेजोड साथ पाउँछ, तब स्वभाविक उ माथि आक्रमण हुन्छ । यो नेपाली राजनीतिभित्रको स्वभाविक तर राजनीतिको अस्वभाविक चित्र हो । तर हाम्रो देश छ नै यस्तै, यहाँ व्यापारमा, व्यवसायमा, संचारमा, अधिकारमा नयाँलाई गार्है हुन्छ, पूरानाको टोकसोले अफ्ट्यारै हुन्छ । त्यसमाथि अव पूराना नेताहरुले बनाएनन् देश भनेर देश बनाउने हुटहुटी बोकेर हिंडेकाहरुलाई अफ्ट्यारै हुन्छ, रवि लामिछानेहरुलाई अफ्ट्यारै हुन्छ, भएको छ ।

राजनीतिमा लागेकै कारण रविले हरेक त्रुटीमा छुट पाउनुपर्छ भन्ने जरुर होइन, तर रविसँगै नेपाली राजनीतिमा आशाको दियो देख्नेहरुलाई निराश बनाउनेगरी रविका अनेक कामलाई खोतालिदैछ, र बिगतमा गरेका, भएका कमजोरी र त्रुटीहरुले रविलाई लखेटी रहेका छन् । नहोस् त्यस्तो कामना छ, तर आज हामी रवि लामिछाने अव थप अफ्ट्यारोमा कहाँ कहाँ पर्न सक्छन् वा पारिन सक्छन् भन्ने तथ्यलाई केलाउँदैछौँ । यसको अर्थ रवि सहि छन्, वा रवि गलत छन् भन्ने होइन । बरु यो देशको कानुनलाई टेकेर रविमाथि के केसम्म हुन सक्छ वा रविले देशको कानुनबारे के के बुझ्नुपर्छ भन्ने तथ्यको उजागर प्रयास हो । किनकि सत्य यो पनि हो कि कुनै बेला रवि स्वयमले कतिपय ससाना कुराहरुलाई नजरअन्दाज गर्दा त्यसको ठुलो सजाय पाएका थिए उनले । उनको नागरिकताको विवादपछि गुमेको गृहमन्त्री पद त्यसैको उदाहरण थियो । र अव त्यस्तो कहिल्यै नहोस् भन्ने कामनासहित उनी कहाँकहाँ फसेका छन् वा फसाइन सक्छन् भन्ने तथ्य केलाउँदैछौँ ।

पहिलो उदाहरण, ताजा उदाहरण
सहकारी ठगीको पैसाले खोलेको टेलिभिजनमा पाएको १५ % सेयरवापतको पैसा लामिछानेको निजी खातामा जम्मा भएको खबर सार्वजनिक भएपछि रवि लामिछानेले प्रेस मिट गरेर र सामाजिक संजालमा स्ट्याटस लेखेर त्यसको खण्डन गरेका थिए । तर खण्डनका क्रममा उनैले बोलेका कतिपय चीज उनका लागि भारी पर्न सक्ने देखिएको छ । रविले सोमबार पत्रकार सम्मेलनपछि सामाजिक सञ्जालमा लेख्दै आफ्नो खातामा १ करोड ८० लाख जम्मा भएको भौचर देखाएपछि मात्र कम्पनी रजिष्ट्रारको कार्यालयबाट राईको नाममा सेयर नामसारी हुने भएकाले कागजी प्रक्रियाका लागि मात्र कागजपत्र बनाएको र झुटो विवरण उपलब्ध गराएर सेयर हस्तान्तरण गरिएको स्वीकार गरेका हुन् । र उनको यहि स्वीकारोक्ति उनलाई भारी पर्न सक्ने देखिएको हो । कारण ग्यालेक्सी फोरके टिभीको सेयर जिबी राईको नाममा हस्तान्तरण गर्दा कम्पनी रजिष्ट्रार कार्यालयलाई झुक्याएको तथ्य स्वयम् लामिछानेले सार्वजनिक गरेको स्ट्याटसबाट बुझ्न सकिन्छ र कम्पनी ऐनको दफा १६० अनुसार यस्तो काम गर्नेलाई ५० हजार रुपैयाँसम्म जरिवाना वा दुई वर्षसम्म कैद वा दुवै सजाय हुन सक्ने उल्लेख छ ।

हुन त व्यवहारिक रुपमा यस्तो धेरैले गर्छन्, तर यसको अर्थ रविले पनि गरे ठिकै गरे भन्नेचाहिं पक्कै होइन । यो कुरा स्वयम् लामिछानेले स्वीकार गरेका छन् । यहि कानुन र रविले दिएको सार्वजनिक अभिव्यक्तिसँगै उनले गरेको कागज बोकेर कोहि कम्पनी रजिष्ट्रारको कार्यालयमा उजुरी बोकेर गयो भने छानविन हुन्छ । छानविनका क्रममा रविले कागज मात्र मिलाएको देखिए कम्पनी ऐनको दफा १६० अनुसार उनलाई सजाय हुन्छ । कम्पनी रजिष्ट्रारको कार्यालयले सबै प्रक्रियामै छ भनिदियो भने उनको खातामा जीबी राईको पैसा गएको छ भन्ने पुष्टी हुन्छ, जुन उनका लागि झन् घातक हुन्छ, र उनले पनि यो चाहेका छैनन् । रविका पछि कति धेरै मान्छे लागेका छन् भन्ने तथ्य त तपाईं हामीले देखेका नै छौं, त्यसैले हिजोको पत्रकार सम्मेलन र उनी आफैंले लेखेको स्ट्याटस उनका लागि भारी पर्न सक्छ । आखिर नेपाल न हो, एउटा ठाउँ पाएपछि आफ्नैले आफ्नैलाई त सिध्याउँछन् भने रविको उदय, धेरैका लागि चिन्ताको विषय बनेको अवस्थामा उनलाई सिध्याउन राज्य नै नलाग्ला भन्न सकिन्न ।

कम्पनी ऐनको दफा १६० (क) मा कम्पनीको कुनै सञ्चालक वा पदाधिकारीले कम्पनीको कुनै कागजपत्रमा बदनियत वा द्वेषपूर्ण लापरवाहीसाथ कुनै झुटा कुरा उल्लेख गरी कम्पनी वा कुनै व्यक्तिलाई हानी नोक्सानी पु¥याएको भए त्यस्तो सञ्चालक वा पदाधिकारीलाई ५० हजार रुपैयाँसम्म जरिवाना वा २ वर्षसम्मम कैद वा दुवै सजाय हुन सक्ने व्यवस्था छ । त्यस्तै कम्पनी ऐनको दफा १६० को (ज) मा ऐन बमोजिमको विवरण नदिने वा झुट्टा विवरण दिने सेयरधनीलाई ५० हजार रुपैयाँसम्म जरिबाना र दुई वर्षसम्म कैद वा दुवै सजाय हुने व्यवस्था छ ।कम्पनी ऐनले कुनै सञ्चालक वा पदाधिकारीले कम्पनीको कुनै कागजपत्रमा बदनिय वा द्वेषपूर्ण लापरबाहीका साथ कुनै झुट्टा कुरा उल्लेख गरे कारबाही हुन सक्ने व्यवस्था गरेकाले रवि माथि सजाय हुन सक्छ । सेयर हस्तान्तरणका लागि राईले आफ्नो खातामा जम्मा गर्न पैसा नै नभएको चेक बुझाएको विषयमा रविले सहमति दिएर कम्पनी रजिष्ट्रारको कार्यालयलाई ढाटेका स्वीकारेका छन् ।

रविले स्वेट सेयरवापत कम्पनीको १५ % सेयर पाएको डकुमेन्ट कम्पनी रजिष्ट्रारको कार्यालयको अभिलेखमा छ । र कार्यालयको अभिलेख नै अन्तिम मानेर यहि नै ठिक हो ठहर भयो भने उनले स्वेट सेयरवापत १ करोड ८० लाख रुपैयाँ पाएका छन् । स्वेट सेयरसम्बन्धि स्पस्ट कानुन नभए पनि आकस्मिक रुपमा पाइने कुनै पनि रकममा नियमानुसार २५ प्रतिशत कर तिर्नुपर्छ भन्ने कर कानुनलाई देखाएर उनीसँग १ करोड ८० लाख रुपैयाँको २५ % रकम असुल गर्न पनि सक्छ राजश्व विभागले । यस्तो भयो भने उनी थप नैतिक संकटमा पर्न सक्छन्।

रविका भूपू पार्टनर जीबी राई सहकारी ठगी प्रकरणमा फरार छन् । उनी पक्राउ पर्नेबित्तिकै उनको बयान हुनेछ । बयानका क्रममा जीबी राईले रवि लामिछानेलाई पनि पोले भने यहि कारण अनुसन्धानका लागि मात्रै भए पनि रविविरुद्ध पक्राउ पूर्जी जारी हुनेछ । उदाहरणका लागि पोखराको मित्र मिलन सहकारीमा ठगी गरेका रमण पौडेलले दिएको सामान्य बयानका आधारमा अन्यलाई पनि पक्राउ पूर्जी जारी भएको छ । यहि कुरा देखाएर रविलाई सिध्याउन स्वयम् राज्य लाग्न सक्छ । आखिर राजनीति न हो, जे पनि हुन सक्छ ।

अझ ती त देखाइएका, वा पछिल्लो समय देखिएका कुरा हुन् । कुरा खोतल्दै जाँदा पेट भित्र त फोहोर भेटिन्छ भने, रवि लामिछाने वा कोहि पनिका कमजोरी नभेटिने कुरै भएन। अझ सेयर हस्तान्तरण प्रकरणमा त रविले आफुलाई कीर्ते गरेको जस्ता आरोप आउन सक्नेसमेत स्वीकारेका छन् । यसको अर्थ उनी ठुलो झमेलामा पर्न सक्छन् ।

हो, यो देशमा ठुला ठुला घोटाला प्रकरण भएका छन्, राज्य त्यसमा केन्द्रीत छैन । मात्र विरोधीहरुलाई रवि लामिछाने सिध्याउनुपरेको छ । ठुला ठुला केसमा गर्नुपर्ने खोजी बाँकी छ । तर यहाँ त रवि लामिछानेकै केस खोज्नुछ धेरैलाई ।

हुन त रवि मात्र पनि यसका लागि दोषी छैनन्, बरु उनका सल्लाहकारले पनि उनलाई ठाउँ ठाउँमा सिध्याएका छन् । हिजो नयाँ नागरिकता लिनुपर्छ भनेर सल्लाह दिनुपर्ने ठाउँमा, ह्या हामीलाई कसले छुन्छ र भनेर सल्लाह दिएका सल्लाहकारहरुकै कारण उनको गृहमन्त्री पद नै गुम्यो । हिजो केहि पत्रकार हरुले गरेको खबरदारीलाई उल्टो अर्थ लगाउन तीनै सल्लाहकारहरुको सल्लाह हुँदा उनी धेरै ठाउँमा चुकुनु पर्यो । आज तिनै सल्लाहकारहरुले फेरी उनलाई गलत सल्लाह दिंदैछन् । सोमबार पत्रकार सम्मेलनमा बैंकका कर्मचारी नै हाँस्नेगरी उनका सल्लाहकारले दिएको अचम्मको अभिव्यक्ति यसैको अर्को उदाहरण हो ।

एक बर्ष अघि मिडियालाई गाली गरेर ठेगान लगाउनुपर्छ भन्ने पनि सायद तिनै सल्लाहकारहरुकै सल्लाह थियो, जुन उनलाई नै भारी परेको छ । एक बर्षपछिको पत्रकार सम्मेलनमा उनले मिडियासँग माफी त मागेका छन्, तर यो बेलासम्म उनीमाथि धेरै आक्रमण भईसकेको थियो । यहि बीचमा मिडियालाई चिढ्याउने, मुद्धा हालेर ठेगान लगाउनुपर्छ भनेर उक्साउने सल्लाहकारहरुले अझै पनि उनको भलोको सल्लाह दिईरहेका छैनन् । किनकि देश बनाउँछु भनेर हिंडेका दाजु बनाउने देश हो, कसैको स्वार्थकेन्द्रित सल्लाहका भरमा काम गर्ने होइन ।

रवि लामिछानेसँग जनताले ठुलो आस राखेका छन् । र त यति धेरै विरोध र विवाद हुँदा पनि उनका समर्थकहरुले उनलाई चट्टानी अडान लिएर समर्थन गरेका छन् । सबै गलत, तर रवि सहि हुन् भन्ने मान र भान हुनेगरी जस्ता समर्थक उनले कमाएका छन्, त्यो नेपाली राजनीतिमा बिरलै देख्न पाइन्छ । यस्तै कानुनी झमेलामा नपर्ने हो भने ८४ सालपछि उनलाई प्रधानमन्त्री हुन खासै कुनै शक्तिले रोक्ने देखिन्न । तर यस्तै विवादको चंगुलमा परिरहने र त्यसलाई उचित समाधान गर्नुको सट्टा बेकामे सल्लाहकारहरुको गलत सल्लाहको पछि लागिरहने हो भने रविलाई आफ्नैले सिध्याउनेछन् । जनताले त उनलाई अपार माया, अगाध स्नेह र गज्जबको मत दिएका छन् । विश्वास दिएका छन्, किनकि विश्वास राखेका छन् जनताले रवि प्रति । भरोसा राखेका छन् रवि प्रति धेरै जनताले । जनताको अपेक्षा छ, जसरी हुन्छ रवि प्रधानमन्त्री बन्नुपर्छ । तर सल्लाहकारका गलत सल्लाह सुनिरहने हो भने अहिलेका प्रधानमन्त्रीले राज्यको पावर देखाएर रविलाई एक चुट्कीमा सिध्याईदिन सक्छन् ।

रवि दाई, शुभकामना छ, अव उपरान्त कुनै विवादमा पर्नु नपरोस् तपाईं ।तर सचेत जरुर हुनुहोला, रविको नाम भजाएर आफ्नो स्वार्थको व्यापार गर्नेहरुसँग ।

देख्न पाउँ तपाईंलाई यो देशको प्रधानमन्त्रीको रुपमा, तर तपाईं जति परिपक्व हुनुभएको छ, अझ परिपक्वता आवश्यक छ । किनकि देशको सिष्टम त कतिसम्म गएजुग्रेको रहेछ भन्ने तथ्य कम्पनी रजिष्टारको कार्यालयमा गर्नुपरेको व्यवहारले थाहा पाइनै सक्नुभयो होला । यो देशको कम्पनी दर्ता गर्ने ठाउँमा के के सम्म हुने रहेछ थाहा पाउनुभयोहोला । अनि हाम्रा देशको ठुलो भनिएको बैंकमा दुई कर्मचारीले भेरिफाई गरेर दिएको कागजमा एउटा मितिसमेत मिल्दो रहेनछ भन्ने पनि थाहा पाउनुभयोहोला । अव थाहा पाउन जरुरी छ, आलोचना सहनै नसकेर संचारकर्मीलाई ब्लक गर्नेहरु तपाईंको नाम भजाएर लोकतन्त्रका गफ चुटिरहेका छन् । हाम्रो सभापति अव रवि होइन, स्वर्णिम वाग्ले हुनुपर्छ भनेर विपक्षीसँग कफी पिउनेहरु तपाईं वरपर मेरो रवि दाई भनेर स्वार्थको अँगालो मारिरहेका हुनसक्छन् । बाहिर तपाईंलाई गज्जब भन्ने, भित्र भित्र तपाईंको खेदो खन्ने, तपाईंका अगाडी ठुला र चिप्ला कुरा गर्ने, एक पेग लगाएपछि तपाईंलाई आमाचकारी गाली गर्नेहरुसँग तपाईं सचेत हुन आवश्यक छ । किनकि दुश्मनले बिगार्न धेरै समय लाग्छ, सिध्याउने आफ्नैले हो । (भिडियो)