काठमाडौँ । बाँसबारी छाला जुत्ता कारखानको जग्गा हिनामिना प्रकरणमा पक्राउ परेका व्यवसायी अरुण चौधरी मंगलबार (आज) रिहा हुने भएका छन् । जिल्ला अदालत काठमाडौँको आदेशअनुसार चौधरीलाई मंगलबार रिहा गरिने भएको हो ।

२२ माघ (सोमबार) म्याद थपका लागि अदालतमा उपस्थित गराइएका चौधरीलाई अदालतले माघ २२ गतेदेखि लागू हुनेगरी दुई दिनको म्याद थप गरे पनि मंगलबारसम्म रिहा गर्न आदेश दिएको थियो ।

न्यायाधीश यज्ञप्रसाद आचार्यको इजलासले अनुसन्धानको कार्यमा सहयोग गर्ने कागज बनाई चौधरीलाई जमानीमा छोड्न आदेश दिएको हो । त्यस्तै, अदालतले चौधरीसँगै पक्राउ परेका बाँसबारी जुत्ता कारखाना लिमिटेडका कार्यकारी अध्यक्ष अजितनारायाण सिंह थापा र सीजी चाँदबाग रेसिडेन्सी प्रालिका सञ्चालक सञ्जय ठाकुरलाई पनि मंगलबार नै रिहा गर्न आदेश दिएको छ ।

अदालतले बाँसबारी जग्गा हिनामिना प्रकरणमा पक्राउ परेका प्रतिवादीहरुलाई २५ दिनसम्म नै हिरासतमा राखी अनुसन्धान गर्न पर्नेसम्मको अवस्था नदेखिएको ठहर गरेको छ ।