काठमाडौँ । बाँसबारी जग्गा हिनामिना प्रकरणमा पक्राउ परेका व्यवसायी अरुण चौधरीले कानुन विपरित भए जग्गा फिर्ता गर्ने बताएका छन् । पक्राउ परेका चौधरीले प्रहरीसमक्ष बयान दिँदै यस्तो बताएका हुन् ।

बयानमा चौधरीले बाँसबारीको सरकारी जग्गा गैरकानुनी रुपमा नहडपेको तर कानुन विपरित भए फिर्ता गर्न आफू तयार रहेको बताएको अनुसन्धानमा संलग्न एक अधिकारीले बताएका छन् । ती अधिकारीका अनुसार प्रहरीको केन्द्रीय अनुसन्धान ब्यूरो (सीआईबी)को अनुसन्धानमा चौधरीले १० रोपनी जग्गा हिनामिना गरेको देखिए पनि उनले भने उक्त जग्गा आफूले कानुन अनुसार नै लिएको दाबी गरेको छन् ।

त्यस्तै, प्रहरीले सोही प्रकरणमा पक्राउ परेका बाँसबारी छालाजुत्ता कारखानाका तत्कालीन कार्यकारी निर्देशक अजितनारायण थापासँग पनि बयान लिइसकेको छ । बयानमा उनले जग्गाबारे आफूले गरेको निर्णय गलत हो भन्ने नै थाहा नभएको बताएका छन् ।

सोही प्रकरणमा सीआईबीले सीजी चाँदबाग रेसिडेन्सीका अध्यक्ष सञ्जय ठाकुरलाई पनि पक्राउ गरी अनुसन्धानका लागि अदालतबाट अनुमति पनि लिइसकेको छ ।