काठमाडौँ । प्रतिनिधिसभा सदस्य प्रतिक्षा तिवारीले बैंकको ब्याज महँगो हुँदा व्यापारी-व्यवसायी विस्थापित हुने अवस्थामा पुगेको बताएकी छिन् । आइतबार प्रतिनिधिसभाको बैठकको शून्य समयमा बोल्दै सांसद तिवारीले यस्तो बताएकी हुन् । 

उनले अहिले बैंकको ब्याज महँगो हुँदा कर्जा नीति कसिलो भएकाले बैंकबाट कर्जा लिएर व्यापार-व्यवसाय गर्ने अवस्था व्यवसायी नभएको बताइन् । हाल बैंकमा पैसा थुप्रिरहेको भए पनि कर्जा लगानी हुन नसक्दा उद्योग-कलकारखाना बन्द हुने अवस्थामा पुगेको तिवारीले बताएकी छिन् । यसरी बैंकको चर्को ब्याजदरका कारण व्यवसायी मर्कामा पर्दा र व्यवसाय धराशायी हुँदा पनि राज्य गम्भीर नभएको सांसद तिवारीको आरोप छ । 

त्यस्तै, उनले व्यापारी-व्यवसायी र कर्जा लिएर केही गर्न चाहने नागरिकका लागि बैंकको कर्जा नीति सजिलो बनाउन पनि माग गरेकी छिन् । 

‘बैंकको ब्याजदर महँगो भएको छ । १२ प्रतिशतबाट बैंकको ब्याजदर घटाउनुपर्यो । व्यवसाय गर्न चाहने नागरिकलाई कर्जा प्रवाह गर्न बैंकको कर्जा नीति सजिलो बनाउनुपर्यो ।’, उनले भनिन्, ‘बैंकमा पैसा थुपारेर उद्योग-व्यवसाय बन्द गराउने, बेरोजगार बढाउने यो सरकारको नागरिकप्रतिको गैरजिम्मेवारपन हो, तसर्थ व्यवसायीको मनोबल उठ्नेगरी सजिलो तरिकाले कर्जा लिने वातावरण बनाउन सरकारको ध्यानाकर्षण गराउँछु ।’