काठमाडौँ । कान्तिपुर सेभिङ्ग एण्ड क्रेडिट कोअपरेटिभलाई समस्याग्रस्त घोषणा गर्न सिफारिस गरिएको छ । माघ २९ गते सहकारी विभागले कान्तिपुर सहकारीलाई समस्याग्रस्त घोषणा गर्न भूमि व्यवस्था, सहकारी तथा गरिबी निवारण मन्त्रालयमा सिफारिस गरेको हो ।
बचतकर्ताको साढे ६ अर्ब रुपैयाँ हिनामिना गरेका सहकारी सञ्चालकले सोही रकमबाट निजी सम्पत्ति गरेको, घरजग्गा र होटलमा लगानी गरेको पाइएको थियो ।
सहकारीमा रकम हिनामिनापछि बचतकर्ताहरुले सहकारीविरुद्ध प्रहरी र सहकारी विभागमा सहकारीका सञ्चालकविरुद्ध उजुरीसमेत दिएका छन् । सोही उजुरी, सहकारीमा भएको रकम हिनामिना र सहकारीको अवस्थाका आधारमा संस्थालाई समस्याग्रस्त घोषणा गर्न सिफारिस गरिएको सहकारी विभागका एक अधिकारीले बताएका छन् ।
योसँगै अब मन्त्रालयले विभागले गरेको सिफारिस, प्राप्त प्रमाण र विवरणका आधारमा कान्तिपुर सहकारीलाई सहकारी ऐनको दफा १०४ अनुसार समस्याग्रस्त घोषणा गर्नेछ ।
समस्याग्रस्त घोषणा भएसँगै मन्त्रालयको सिफारिसका आधारमा सहकारी व्यवस्थापन समितिले संस्थाको सम्पत्ति र दायित्वको विवरण यकिन गर्नेछ । साथै, समस्याग्रस्त घोषणा भएपछि सहकारीमा भएको रकम हिनामिनाबारे थप अनुसन्धानको जिम्मा प्रहरीको केन्द्रीय अनुसन्धान ब्युरो (सीआईबी)लाई दिइनेछ ।
