काठमाडौँ । एनआईसी एशिया बैंकले एकैपटक ५० शाखा बन्द गर्ने भएको छ । चलाउन नसकेपछि बैंकले देशभरका कम्तीमा ५० शाखा र एक दर्जन विस्तारित (एक्सटेन्सन) काउन्टर बन्द गर्न लागेको हो ।

शाखा तथा एक्सटेन्सन काउन्टर बन्द गर्नका लागि बैंकले नेपाल राष्ट्र बैंकमा पनि निवेदन दिइसकेको छ । बैंकको निवेदनमा राष्ट्र बैंकले स्वीकृति दिएसँगै बैंकको शाखा कार्यालय बन्द गर्न प्रक्रिया अघि बढाउनेछ । राष्ट्र बैंक स्रोतका अनुसार बैंकले सरकारका विभिन्न मन्त्रालय, विभाग तथा कार्यालयमा राखिएका एक्सटेन्सन काउन्टर र ग्रामीण क्षेत्रमा रहेका बैंकका शाखामा खर्च अत्याधिक रहेको र व्यवसाय खासै नभएको भन्दै शाखा बन्द गर्न निवेदन दिएको छ ।

तर, बैंकले भने एक्सटेन्सन काउन्टर मात्रै बन्द गर्न लागेको जनाएको छ । बैंकका अनुसार एक्सटेन्सन काउन्टर राख्नु अघि नै स्थानीय सरकारका खाता राष्ट्रिय वाणिज्य बैंकमा भएको तर खाता नसारेपछि विस्तारित काउन्टर बन्द गर्न लागेको जनाएको छ ।

हाल बैंकले देशभर ३६० वटा शाखा कार्यालय, ११० वटा एक्सटेन्सन काउन्टर, ६१ वटा शाखारहित इकाई र ६४५ वटा एटिएममार्फत सेवा दिँदै आएको छ ।