">
काठमाडौँ । नेपाली सेयर बजारमा बैंकिङ क्षेत्रमा उत्कृष्ट तीनमध्ये पर्ने भनी चर्चा हुने गरेको एनआईसी एशिया बैंकको सेयर भाउ बैंकमा राष्ट्र बैंकको फर्जी कर्जाकातथ्यांक र कर्जाको स्थितिबारे इन्स्पेक्सन गर्न राष्ट्र बैंक पसेको खबर बाहिर आएपछि निरन्तर घट्न थालेको छ । बजार बढ्दा थोरबहुत बढ्ने गरेको एनआईसी एशियाको सेयर सोमबार भने बजार बढ्दा पनि घटेको हो ।
सोमबारको बजारमा ५ अंकले घटेर बैंकको सेयर भाउ ४५०. १० विन्दुमा आईपुगेको छ । यो घटोत्तरी आइतबारको तुलनामा १.१० प्रतिशतले हो । आइतबारको बजारमा पनि यो कम्पनीको सेयर भाउ ४. १ प्रतिशतले घटेको थियो । सोमबारको कारोबारमा यो कम्पनीको सेयर टप टर्नओभरमा समेत परेको छ । सामान्यतया, कारोबार रकम बढ्दा सेयर भाउ घट्नुलाई राम्रो मानिँदैन ।
बैंकभित्र राष्ट्र बैंकले अनुसन्धान सुरु गरेपछि बैंकका डेपुटी सीइओ सुधिर नाथ पाण्डेले बैंकबाट राजिनामा दिएका थिए । पछि बैंकका संचालक समितिका सदस्यहरुले अनुरोध गरेपछि पाण्डे बैंकको काममा फर्किन तयार भएका थिए । भलै उनको यो कदमलाई धेरै बैंकरहरुले गलत भनेका छन् ।
एनआईसी एशिया बैंकले सार्वजनिक गर्ने खराब कर्जा अनुपात, लगायतका अन्य तथ्यांकहरुमा छेडखानी गरेको, सिमा मिचेर घरजग्गा कर्जा दिएको, नियम मिचेर कर्जा असुली गरेको र बैंकका धेरै कर्जामा समस्या रहेको लगायतका विषयमा बैंकभित्र नियामक राष्ट्र बैंकले विशेष इन्सपेक्सन गरिरहेको छ । स्वयम् गभर्नरले पनि गलत गरेको प्रमाण आफ्नो टेबलमा आएको खण्डमा बैंकलाई कार्वाही हुने सार्वजनिक अभिव्यक्तिसमेत दिईसकेका छन् ।
भलै, बजारका कतिपय लगानीकर्ताले भने अरु डराएका बेला सेयर किन्नुपर्ने धारणा राखिरहेका छन् ।
