काठमाडौँ । नेपाल राष्ट्र बैंकले मंगलबार बैंकिङ प्रणालीबाट ४० अर्ब रुपैयाँ तान्ने भएको छ । प्रणालीमा अधिक तरलता थुप्रिएको भन्दै राष्ट्र बैंकले निक्षेप संकलन उपकरणमार्फत उक्त रकम तान्न लागेको हो ।

राष्ट्र बैंकले मंगलबार बैंकिङ प्रणालीमार्फत तान्न लागेको निक्षेप अवधि १४ दिनको रहेको छ । बैंकिङ प्रणालीमा अधिक तरलता थुप्रिँदा पनि कर्जाको माग न्यून भएपछि तरलता व्यवस्थापनका लागि बैंकिङ प्रणालीमार्फत रकम तान्न लागेको राष्ट्र बैंकले जनाएको छ ।

राष्ट्र बैंकका अनुसार हाल बैंकिङ प्रणालीमा ६१ खर्ब ४३ अर्ब रुपैयाँ निक्षेप रहेको छ । तर, सोही अवधिमा कर्जा लगानी भने ५० खर्ब रुपैयाँ मात्रै भएको छ । अन्तर बैंक ब्याजदर ३.०२ प्रतिशत रहेकोमा ट्रेजरी बिलको ब्याजदर समेत अधिकतम ४ प्रतिशत हाराहारीमा झरेको छ । हाल बैंकहरुले कर्जा÷निक्षेप अनुपात (सिडी रेसियो) ८०.३० प्रतिशत कायम गरेका छन् ।