काठमाडौं । फोहोर टिप्ने बाहनामा झण्डै एक करोडको धनमाल चोर्ने ५ जना पक्राउ परेका छन् । पक्राउ पर्नेमा २६ वर्षीय लक्का भन्ने विकास पोदार, २८ वर्षीय जितेन्द्र पोदार, २७ वर्षीय भाईलाल पोदार, ४० वर्षीय संजय पोदार र ५० वर्षीय मञ्जु देवी पोदार रहेका छन् ।
उनीहरुले दिउँसोको समयमा काठमाडौंका विभिन्न तीन ठाउँबाट गरी झण्डै एक करोडको धनमाल चोरी गरेका हुन् । उनीहरुलाई काठमाडौं उपत्यका अपराध अनुसन्धान कार्यलयबाट खटिएको प्रहरी टोलीले पक्राउ गरेको हो ।
सो समुहले माकलबारी स्थित दिलमाया आले मगरको घरबाट दिउँसोको समयमा कोही नभएको मौका पारी सुनका गरगहना तथा नगद गरी ६५ लाख बराबरको धनमाल चोरी गरेको प्रहरीले जनाएको छ । त्यस्तै, दिनेश घिमिरेको घरबाट सुन तथा नगद गरी २५ लाखको धनमाल चोरी गरेका थिए । त्यसैगरी, काठमाडौँ जिल्ला गोकणेश्वर नगरपालिका वडा नं.३ मा गीता राईको घरबाट सुन तथा चाँदीका गरगहना तथा नगद गरी चार लाख १० हजार रुपैयाँ चोरी गरेको प्रहरीको भनाई छ ।
पक्राउ परेका उनीहरुलाई थप अनुसन्धान तथा कारवाहीका लागि प्रहरी वृत, बौद्ध पठाईएको छ ।
