काठमाडौँ । विश्व वरियतामा नेपाली राहदानी (पासपोर्ट)को पर्फमेन्स निरन्तर खस्किदै गएको छ । ‘द हेन्ली पासपोर्ट इन्डेक्स’ले सार्वजनिक गरेको सन् २०२४ को पासपोर्ट इन्डेक्सअनुसार नेपाली पासपोर्टको वरीयता खस्किदो देखिएको हो । सन् २०२४ मा नेपाली पासपोर्ट विश्व वरीयताको १०३औँ स्थानमा रहेको छ ।
यसो त नेपाली पासपोर्ट सन् २०२३ मा पनि विश्व वरीयताको १०३औँ स्थानमै रहेको थियो ।
‘द हेन्ली पासपोर्ट इन्डेक्स’ले सन् २००६ मा पहिलोपटक पासपोर्टको विश्व वरीयता निकाल्दा नेपाली पासपोर्ट ७६औँ स्थानमा रहेको थियो । तर, त्यसपछि सन् २०१० मा ८८औँ, सन् २०१५ मा १०५औँ र सन् २०२१ मा ११०औँ स्थान हुँदै अहिले १०३औँ स्थानमा पुगेको छ ।
झट्ट हेर्दा नेपाली पासपोर्टको वरीयतामा केही वर्षयता केही सुधार देखिए पनि विश्व वरीयतामा नेपाली पासपोर्टको पर्फमेन्स कमजोर नै रहेको जानकारहरुले बताएका छन् । हाल विश्व वरीयतामा नेपाली पासपोर्टकै स्थानमा द्वन्दग्रस्त लिबिया र प्लालेस्टानइ रहेका छन् । यसले पनि विश्व वरीयतामा नेपाली पासपोर्टको अवस्थालाई छर्लंग पार्दछ ।
त्यस्तै, विश्व वरीयतामा नेपाली पासपोर्टको स्थान सैनिक कुबाट सञ्चालित मुलुक भन्दा पनि पछि छ । विश्व वरीयतामा सन् २०२४ मा म्यान्मार ९७औँ, कंगो ९८औँ, दक्षिण सुडान ९९औँ र नाइजेरिया १००औँ स्थानमा छन् ।
