काठमाडौँ । पोखराको सूर्यदर्शन सहकारीको सञ्चालक समितिका सदस्य प्रमोद भट्टराई जेल चलान भएका छन् । कास्की जिल्ला अदालतका न्यायाधीश रामचन्द्र शर्माको एकल इजलासले भट्टराईलाई पुर्पक्षका लागि जेल चलान गर्न आदेश दिएको हो । अदालतको आदेशसँगै भट्टराईलाई जेल चलान गरिएको जिल्ला प्रहरी कार्यालय कास्कीले जनाएको छ ।
सुनसरीको इनरुवा नगरपालिका-५ घर भएका भट्टराईलाई काठमाडौँ प्रहरीले बिहीबार गोकर्णेश्वर नगरपालिकाबाट पक्राउ गरेको थियो ।
पक्राउ परेसँगै जिल्ला अदालत पेश गरिएकोमा अदालतले भट्टराईलाई पुर्पक्षका लागि कारागार चलान गर्न आदेश दिएको हो । योसँगै सूर्यदर्शन सहकारी ठगी प्रकरणमा पक्राउ पर्नेको संख्या पाँच पुगेको छ ।
यसअघि पक्राउ परेका सहकारीका उपाध्यक्ष कैलाशकुमार दर्लामी, कोषाध्यक्ष कुमार रम्तेल, पूर्वसञ्चालक समितिका सदस्य शिवबहादुर गुरुङ (महेन्द्र भोटे) र भविश्वर अर्याल पनि पुर्पक्षका लागि कारागार चलान भइसकेको छन् । सहकारीका अध्यक्ष गितेन्द्रबाबु (जिबी) राई भने अझै फरार रहेका छन् ।
