काठमाडौँ । जी न्युजको टेलिभिजन कार्यक्रम ‘प्रफिट मेकर्स’मा अन्तर्वार्ता दिएर सेयर खरिदबिक्रीको सल्लाह दिई आफैँ चलखेल गर्ने १५ जना कारवाहीमा परेका छन् । जी न्युजको एक टेलिभिजन कार्यक्रममा जाने एक्सपर्टहरुले पहिला नै आफ्नो टिममा आफुले भनेका कुरा राख्ने, र टेलिभिजनको सो कार्यक्रम प्रशारण भएपछि त्यसको फाइदा लिने गरेको देखिएपछि सेबीले ती १५ जना एक्सपर्टहरुलाई कार्वाही गरेको हो ।
भारतीय सञ्चारमाध्यम ‘लाइभमिन्ट’का अनुसार सेबीले उनीहरुलाई ७ करोड ४१ लाख भारतीय रुपैयाँको जरिवानासमेत गरेको छ।
सेबीका अनुसार टेलिभिजनमा अन्तर्वार्ता दिने १० जना र उनीहरुको समूहका ५ जनालाई कारवाही भएको हो । उनीहरुलाई कारोबारमासमेत विभिन्न खालका बन्देज लगाइएको छ ।
लाइभमिन्टको समाचार अनुसार सेबीले जी न्युजमा सन् २०२२ फेब्रुअरी १ देखि २०२२ डिसेम्बर ३१ सम्मका टिभी कार्यक्रमबारे छानविन गर्दा यस्तो तथ्य बाहिरिएको थियो । टेलिभिजन अन्तर्वार्तामा जाने नियत नै गलत देखिएको भन्दै सेबीले उनीहरुलाई कार्वाही गरेको जनाएको छ ।
सेबीको कार्वाहीविरुद्ध ती १५ जना पुनरावेदनका लागि अदालत जाने तयारीमा छन् भने यस विषयमा अन्तिम टुंगो नलागेसम्म टेलिभिजनका सबै रेकर्डहरु सुरक्षित राख्न जई न्युजलाई सेबीले अनुरोधसमेत गरेको छ ।
