काठमाडौँ । निक्षेपकर्ताले पैसा झिक्ने क्रम नरोकिएपछि एनआईसी एशिया बैंकले ब्याजदर बढाएको छ । बैंकबाट निक्षेपकर्ताले ४० अर्ब हाराहारी रकम झिकेपछि बैंकले चैत महिनामा निक्षेपको ब्याजदर बढाएको हो । योसँगै फागुनमा व्यक्तिगत मुद्दती निक्षेपमा ८ प्रतिशत ब्याज दिएको एनआईसी एशिया बैंकले चैत महिनामा भने ८.५४ प्रतिशतका दरले ब्याज दिने भएको छ ।

त्यस्तै, बैंकले चैत महिनामा संस्थागत मुद्दती निक्षेपमा ७.५४ प्रतिशत ब्याज दिने भएको छ । एनआईसी एशिया बैंकले यसअघि फागुनमा संस्थागत मुद्दती निक्षेपमा ६ प्रतिशत ब्याज दिँदै आएको थियो ।

बैंकबाट लगातार निक्षेपकर्ताले रकम झिक्न थालेपछि निक्षेप रोक्नका लागि बैंकले चैत महिनामा निक्षेपको ब्याजदर बढाएको हो । चैत महिनाका लागि एनआईसी एशियाले ब्याजदर बढाउँदा २० वाणिज्य बैंकमध्ये १७ वाणिज्य बैंकहरुले भने ब्याजदर घटाएका छन् । चैत महिनामा ब्याजदर बढाउने एनआईसी एशिया बैंक एक्लो हो । चैतमा प्रभु बैंक र ग्लोबल आइएमई बैंकले भने फागुनकै ब्याजदरलाई निरन्तरता दिएका छन् ।

त्यस्तै, चैतमा सबैभन्दा धेरै एभरेष्ट बैंक र एनएमबि बैंकले ब्याजदर घटाएका छन् । यी दुवै बैंकले फागुन महिनाको तुलनामा चैतमा व्यक्तिगत मुद्दती निक्षेपको ब्याजदर अधिकतम १.५ प्रतिशतबिन्दुले घटाएका छन् भने संस्थागत मुद्दती निक्षेपको ब्याजदर ०.५ प्रतिशतबिन्दुले घटाएका छन् ।