काठमाडौँ । चालु आर्थिक वर्ष २०८० ८१ को पछिल्लो ८ महिनामा नेपालमा झण्डै ४० करोडको चुइगम आयात भएको छ । भन्सार विभागको तथ्यांकअनुसार साउनदेखि फागुनसम्ममा ३९ करोड ८० लाख ५७ हजार रुपैयाँको चुइगम आयात भएको हो ।

विभागको तथ्यांकअनुसार पछिल्लो ८ महिनामा नेपालमा सबैभन्दा धेरै चुइगम भारतबाट आयात गरिएको छ । यसअवधिमा भारतबाट ३८ करोड ७५ लाख १४ हजार रुपैयाँको चुइगम आयात गरिएको छ ।

त्यस्तै, अमेरिकाबाट ८२ लाख २६ हजार, युकेबाट २ लाख ७५ हजार मूल्य बराबरको चुइगम नेपालमा आयात गरिएको छ । गत वर्ष सोही अवधिमा नेपालमा ७१ करोड १७ लाख ७२ हजार रुपैयाँको चुइगम आयात गरिएको थियो ।