काठमाडौँ । धरान उपमहानगरपालिकाका मेयर हर्क साम्पाङले अर्थमन्त्री वर्षमान पुनलाई भेटेका छन् । आइतबार साम्पाङले पुनलाई अर्थमन्त्रालयमै भेटेका हुन् । भेटमा मेयर साम्पाङले पुनलाई अर्थमन्त्रीमा नियुक्त भएकोमा बधाई दिएका छन् । साथै उनले धरानका समस्याबारे अर्थमन्त्रीलाई ब्रिफिङसमेत गरेका थिए ।

भेटकै क्रममा अर्थमन्त्री पुनले पनि आफू धरानको समस्याको बारेमा जानकार रहेको बताएका छन् । उनले धरानमा खानेपानीकै समस्याका कारण कतिपयले बसाइँसराई गर्ने गरेको सुनेको भन्दै स्वच्छ खानेपानीको व्यवस्था गर्ने योजना बनाएको जानकारी गराएका छन् ।

‘धरानमा खानेपानीको समस्याबारे म जानकार छु ।’, अर्थमन्त्रीले भने, ‘बजेटमार्फत केही न केही समाधान खोज्नेछौँ, म तपाईंसँगै छु ।’

त्यस्तै, मेयर साम्पाङले अर्थमन्त्री पुनसँगको भेटमा अर्थमन्त्रीबारे आम सर्वसाधारणमा सकारात्मक धारणा रहेकोले आफू योजना माग्नका लागि आएको पनि उल्लेख गरेका छन् ।