काठमाडौँ । कृषि बिकास बैंकले सहायकस्तरमा कर्मचारी माग गरेकोमा ५० हजारभन्दा बढीले आवेदन दिएका छन् । बैंकले देशभरबाट आवेदन बुझ्दा यति धेरैको आवेदन परेको हो । तर बैंकले लिएको गलत नीतिका कारण बैंकको परिक्षामा ३० प्रतिशत हाराहारीले मात्र परिक्षा दिएका छन् ।

तर, देशभरबाट आवेदन मागेको बैंकले परिक्षा भने काठमाडौँमा मात्र गर्ने निर्णय गरेर आवेदकमाथि नै अन्याय गरेको छ । बैंकको यो निर्णयबाट देशभरका ३५ हजार परीक्षार्थी नै परिक्षाबाट बन्चित भए । बैंकका गुनासो सुनुवाई अधिकृत हिरा आलेले बैंकमा आवेदन दिएकामध्ये ३० प्रतिशतले पनि परिक्षा दिएको पुष्टी गरे । उनका अनुसार सोचेभन्दा कमले परिक्षा दिएका छन् । प्रदेशबाट आवेदन दिएकाहरु काठमाडौँ आउन सक्ने अवस्था नभएपछि उनीहरुले परिक्षा दिन नपाएका हुन् ।’

यता कृषि बिकास बैंककै कर्मचारी पनि बैंकको गलत नीति र सीइओको गलत निर्देशनका कारण परीक्षार्थी कम भएको तर्क गर्छन् । ‘यो आफ्नालाई मात्र जागिर खुवाउने सीइओको टेक्निक हो । सूदूरपश्चिमबाट काठमाडौँ गएर, बसेर, परिक्षा दिएर सूदूरपश्चिम आउँदा १५ हजार बढी खर्च हुन्छ । अनि को जान्छ काठमाडौँ ?’ सूदूरपश्चिम प्रदेशमा कृषि बिकास बैंकमै कार्यरत कर्मचारी भन्छन्- ‘मेरै भाई काठमाडौँ जाने अवस्था रहेन । यो सरासर अन्याय हो ।’

लोकसेवा आयोगको प्रचलित व्यवस्था अनुसार पनि प्रदेशस्तरमा आवेदन लिएपछि प्रदेशमै परिक्षा गर्नुपर्ने नियम छ । तर बैंकका गुनासो सुनुवाई अधिकृत आले आफुहरुलाई सो ऐन आकर्षित नहुने र कृषि बिकास बैंकको पदपूर्ति विभागले नै परिक्षा लिएर मान्छे राख्न पाउने दाबी गर्छन् । सोहि ऐन आकर्षित नहुने भएकाले नै काठमाडौँ वरपरका आफ्ना मान्छेहरुलाई मात्र जागिर खुवाउनेगरी बैंकले ‘बदनियत नै बोकेर’ काठमाडौँमा मात्र सेन्टर राखेको आरोप स्वयम् बैंकरहरुले नै लगाएका छन् ।

यता बैंकका सीइओमाथि लागेको आरोपबारे बुझ्न उनलाई सम्पर्क गर्दा बैंकका सीइओ गोबिन्द गुरुङले फोन नै काटिदिए । बैंकका सीइओले बदनियत राखेर काठमाडौँमा मात्र सेन्टर राखेको भन्दै सो परिक्षा रद्ध गर्न माग गर्दै बैंकका केहि कर्मचारीहरुले नै अख्तियार दुरुपयोग अनुसन्धान आयोग, नेपाल राष्ट्र बैंक लगायतमा उजुरी दिँदैछन् । सो उजुरीमा बैंकका सीइओ गुरुङ र पदपूर्ति समितिका सदस्यहरुलाई प्रतिवादी बनाएर उनीहरुमाथि आवश्यक छानविनको माग समेत राखिने बैंकका कर्मचारीहरुले बताएका छन् ।