काठमाडौँ । महोत्तरीमा २० वर्षपछि बिहे गर्नेलाई सरकारले विवाह खर्च दिने भएको छ । महोत्तरीको बर्दिबास नगरपालिकाले उमेर (२० वर्ष) पुगेपछि विवाह गर्ने मुसहर जाति समुदायका दम्पत्तीलाई ५० हजार रुपैयाँ रकम उपलब्ध गराउने भएको हो ।

बर्दिबास नगरपालिका–१४ स्थित नमुना मुसहर बस्तीका १०८ जनाले लघुजीवन बीमा गराएपछि प्रोत्साहस्वरुप उक्त रकम घोषणा गरिएको नगरपालिकाले जनाएको छ ।

नगरपालिकाको यस्तो घोषणासँगै मुसहर समुदायमा २० वर्ष पूरा भएर विवाह गर्ने दम्पत्तीलाई नगरपालिकाले प्रोत्साहनस्वरुप ५० हजार रुपैयाँ उपलब्ध गराउनेछ । उक्त प्रोत्साहन रकमले नगर क्षेत्रभित्र बालविवाह रोक्नका साथै परिवारको स्वास्थ्यमा पनि सहयोग पुग्ने विश्वास गरिएको छ । नगरपालिकाका अनुसार कम उमेरमै विवाह गर्दा मुसहर महिलाको स्वास्थ्यमा समस्या बढ्दै गएपछि यस्तो योजना ल्याइएको हो ।

त्यस्तै, १८ देखि ६९ वर्ष उमेर समूहका मुसहरहरूको तीन वर्षे लघुजीवन बीमाबापत एक लाख १९ हजार तीन सय ४५ रुपैयाँ जम्मा भएको नगरपालिकाले जनाएको छ । बीमा ‘लिबर्टी माइक्रो लाइफ इन्स्योरेन्स’ लिमिटेड बर्दिबास शाखामा गरिएको छ । यसरी लघुजीवन बीमा गर्ने बीमितले तीन वर्षपछि भवितव्य पर्दा एक लाख रुपैयाँ नगद पाउने कम्पनीले जनाएको छ ।