काठमाडौँ । नेपाल स्टक एक्सचेञ्ज (नेप्से)ले मैलुङखोलाको सेयर कारोबार रोक्का गरेको छ । दोस्रो बजारमा प्रभाव पार्ने लाभांशसम्बन्धी सूचना ढिलो गरी दिएपछि नेप्सेले कम्पनीको सेयर कारोबार रोक्का गरेको हो ।
कम्पनीले बुधबार सञ्चालक समितिको बैठकबाट सेयरधनीलाई २.२२११ प्रतिशत बोनस सेयर दिने प्रस्ताव गरेको थियो ।
तर, कम्पनीले लाभांशबारेको उक्त सूचना नेप्से र लगानीकर्तालाई बिहीबार बजार सयममा (११ः१७ बजे) दिएको थियो । सेयर बजार खुल्नुअघि नै दिनुपर्ने उक्त जानकारी कम्पनीले ढिलोगरी बजार समयमा दिएपछि कारोबार रोक्का गरिएको नेप्सेले जनाएको छ ।
कारोबार रोक्का गर्दै नेप्सेले कम्पनीसँग लाभांश प्रस्तावबारे सूचना ढिलो दिनुको कारणसहित ३ दिनभित्र जवाफ पेश गर्न भन्दै स्पष्टीकरणसमेत सोधेको छ ।
