">
काठमाडौँ । कुश्मा नगरपालिकामा सहकारी पीडितहरुको संख्या बढ्दै गएको छ । नगरपालिकाको सहकारी शाखाका अनुसार पछिल्ला दिन विभिन्न सहकारीका सञ्चालक भागेको, बचत फिर्ता नगरेको तथा कार्यालय नै नखोलेको जस्ता उजुरी दिनेहरु बढेको हुन् । सहकारी संस्थाविरुद्ध उजुरी दिने बढेपछि अहिले कुश्मा नगरपालिकामा सहकारी पीडितहरुले दिएको उजुरीको चाङ्ग लागेको छ ।
उजुरी दिने सहकारी पीडितहरुको संख्या बढ्न थालेपछि नगरपालिकाले १ सय ५ सहकारी संस्थासँग यथार्थ विवरण माग गरेको छ । जसमध्ये नगरपालिकामा केही सहकारी विवरण बुभाईसकेका छन् ।
तर, नगरपालिकामा बुझाइएका अधिकांश सहकारीको विवरणमा कैफियत भेटिएको नगरपालिकाको सहकारी शाखाका एक कर्मचारीले बताएका छन् । ती कर्मचारीका अनुसार यसरी विवरणमा अस्पष्ट भए आवश्यक कागजात झिकाउने र थप कार्वाही प्रक्रिया अघि बढाइएको छ ।
यसो त कुश्मा नगरपालिका यसअघि तीन सहकारी संस्थामा ५५ करोड ठगी प्रकरणमा सहकारीका अध्यक्ष र पदाधिकारी पक्राउ परेका छन् भने कही अझै पनि फरार छन् । ती बाहेक अहिले कुश्मा कार्यक्षेत्र बनाएर सञ्चालन भएका थप ७ सहकारीविरुद्ध पनि नगरपालिकामा उजुरी परेको छ । हाल उजुरी पर्नेमा चुवा व्यवसायिक कृषि सहकारी, बैसाली सहकारी, शिवालय बहुउद्धेश्यीय सहकारी, हिमालय खरेहा र नगर विकास सहकारी लगायत रहेको छन् ।
