काठमाडौँ । सेयर बजारमा करिब ३ महिनापछि ‘पोजेटिभ सर्किट’ लागेपछि विभिन्न ब्रोकर हाउसमा लगानीकर्ताले केक काटेर खुसियाली बाँडेका छन् । सत्ता परिवर्तनको राजनीतिक निर्णयको प्रभावले सोमबार नेप्सेमा सर्किट ब्रेकमै रेकर्ड ब्रेक भएपछि लगानीकर्ताले लड्डु बाँडेर र केक काटेर खुसियाली साटासाट गरेका हुन् ।

यसैबीच झापाको दमकस्थित ब्रोकर नम्बर ७ (जेएफ सेक्युरिटिज)को शाखा कार्यालयमा लगानीकर्ताहरुले केक काटेरै खुसी साटासाट गरेका छन् ।

सेयर लगानीकर्तासँग केक काट्दै सेयर गुरु सुवासचन्द्र भट्टराईले नेपाली राजनीतिमा देखिएको परिवर्तनकै कारण सेयर बजारमा ‘पोजेटिभ सर्किट’ लागेको बताएका छन् । उनले सेयर बजार सुधार र सेयर बजारको विकासका लागि नीति सबैभन्दा महत्वपूर्ण भएकाले आगामी दिनमा आउने राम्रा नीतिले बजारको भविष्यलाई पनि राम्रै बनाउने बताएका छन् ।

करिब ५० जना सेयर लगानीकर्ताको माझमा खुसियाली बाँडेको बताउँदै भट्टराईले सोमबार नेप्सेमा लागेको ‘पोजेटिभ सर्किट’ले मात्रै बजारको दिशा निर्धारण नगर्ने बरु यसले लगानीकर्ताको मनोबल बढाउनुका साथै पूँजीबजारको विकास र विस्तारमा ठूलो योगदान पुर्याउने बताएका छन् । साथै, उनले सबै सेयर लगानीकर्तालाई बधाई पनि दिएका छन् ।