काठमाडौँ । विद्युतको महसुल नतिरेपछि नेपाल विद्युत प्राधिकरणले ग्यालेक्सी फोके टेलिभिजनको बिजुलीको लाइन नै काटिदिएको छ । लामो समयसम्म बिजुलीको पैसा भुक्तानी नगरेको भन्दै प्राधिकरणले टेलिभिजनमा बिजुलीको लाइन काटिदिएको हो ।

लाइन काटिएपछि टेलिभिजनका प्रतिनिधिहरुले टेलिभिजनको शान्ति सुरक्षाको व्यवस्था गरिदिन भन्दै सीडीओलाई पत्र लेखेका छन् । उनीहरुले विद्युत नहुँदा टेलिभिजनको प्रशारण अवरुद्ध हुने मात्र नभई टेलिभिजनमा अवाञ्छित घटना हुनसक्ने भन्दै चिन्ता व्यक्त गरेका छन् ।

टेलिभिजनमा लामो समयदेखि गीत मात्र बजिरहेको छ । नियमित प्रशारण रोकेको टेलिभिजनले सयौँ कर्मचारीहरुलाई तलव दिन बाँकी छ ।

टेलिभिजनका मालिक नै सहकारी ठगी प्रकरणमा फरार भएपछि र टेलिभिजनको जिम्मा लिएका कुमार रम्तेल जेल परेपछि टेलिभिजनले गीत मात्र प्रशारण गर्दै आएको थियो । सो टेलिभिजनमा काम गरेकाले गत बैसाख महिनादेखिको तलव पाएका छैनन् ।