काठमाडौँ । अष्ट्रेलियमा मासुको चोरी रोक्न जिपीएस लोकेटर राख्न सुरु गरिएको छ । दक्षिण अष्ट्रेलियामा पैसा नितिरी खुसुक्क मासु उठाएर लैजाने क्रम बढेपछि ड्रेक सुपरमार्केटले मासुमा जिपीएस लोकेटर राख्न सुरु गरेको हो ।
हाल १३ हप्ताका लागि थालिएको उक्त प्रयोग सफल भए उक्त सुपरमार्केटले देशैभरीका शाखामा मासुमा जिपीएस लोकेटर राख्ने अन्तराष्ट्रिय सञ्चार माध्यमले जनाएका छन् ।
ड्रेकका अनुसार अहिले जिपीएस लोकेटर महँगो मूल्य पर्ने मासु तथा सामानमा मात्रै लगाउने गरिएको छ । प्रतिकिलो ५० देखि १०० डलरसम्म पर्ने मासुका प्रोडक्टमा यसको प्रयोग सुरु गरिएको छ ।
