काठमाडौँ । ज्योति विकास बैंकको खुद नाफा घटेको छ । बैंकले सार्वजनिक गरेको चालु आर्थिक वर्षको तेस्रो त्रैमाससम्मको अपरिस्कृत वित्तीय विवरणअनुसार बैंकको खुद नाफा २४.४० प्रतिशतले घटेको हो ।
पछिल्लो ९ महिना (साउनदेखि चैतसम्म)मा बैंकले कुल १५ करोड २४ लाख रुपैयाँ खुद नाफा आर्जन गरेको छ । जबकी बैंकले गत आर्थिक वर्षको सोही अवधिमा २० करोड १६ लाख रुपैयाँ खुद नाफा आर्जन गरेको थियो ।
समीक्षा अवधिमा बैंकको खुद ब्याज आम्दानी १.७५ प्रतिशतले बढेको छ भने बैंकको कुल सञ्चालन आम्दानी १.५४ प्रतिशतले बढेको छ । खुद ब्याज आम्दानी बढे पनि बैंकको इम्पेयरमेन्ट चार्ज बढ्दा बैंकको खुद नाफा घटेको हो । यसअवधिमा बैंकको इम्पेयरमेन्ट चार्ज ७१ करोडबाट बढेर ८३ करोड रुपैयाँ पुगेको छ । पछिल्लो ९ महिनामा बैंकको निष्क्रिय कर्जा ३.८९ प्रतिशतबाट बढेर ४.९७ प्रतिशत पुगेको छ ।
यस अवधिमा बैंकको वितरणयोग्य मुनाफा २८ करोड ६६ लाख रुपैयाँ ऋणात्मक रहेको छ । त्यस्तै, समीक्षा अवधिमा बैंकको खुद नाफासँगै प्रतिसेयर आम्दानी (ईपीएस) पनि घटेको छ । सो अवधिमा बैंकको ईपीएस १ रुपैयाँ ५९ पैसा घटेर ४ रुपैयाँ ६२ पैसामा झरेको छ । यसअवधिमा बैंकको प्रतिसेयर नेटवर्थ १३४ रुपैयाँ २० पैसा रहेको छ ।
