काठमाडौँ । सेयर बजारका बादशाहका रुपमा परिचित पुराना लगानीकर्ता निर्मल प्रधानले सरकारले छिटोभन्दा छिटो समस्याको समाधान गर्नुपर्ने बताएका छन् । शनिबार सेयर लगानीकर्ताहरूले आयोजना गरेको प्रदर्शन कार्यक्रममा सञ्चारकर्मीहरूसँग कुराकानी गर्दै उनले यस्तो बताएका हुन् ।

उनले लगानीकर्तामैत्री नीति बन्नुपर्ने, १५ करोडको क्याप खारेज गर्नुपर्ने लगायतका मागसमेत सरकारसमक्ष गरेका छन् । सेयर बजारका लगानीकर्तामा आत्मविश्वास गुम्दै गएको बताउँदै प्रधानले सरकारले बेलैमा लगानीकर्ताको घाउमा मल्हम लगाउनुपर्ने बताएका छन् ।

सरकारले लगानीकर्ताको संरक्षण गर्ने नीति लिन अव ढिला गर्न नहुने उनको भनाई छ । ‘बजारलाई संरक्षण गर्न आवश्यक छ । बैंकको ब्याज एकल विन्दुमा झर्न समेत आवश्यक छ ।’ सञ्चारकर्मीहरूसँग कुराकानी गर्दै प्रधानले भने, ‘सरकारले १५ करोडको क्याप जुन लगाएको छ, त्यसलाई तत्काल हटाउन आवश्यक छ ।’