काठमाडौँ । नेपाल धितोपत्र बोर्डको अध्यक्षका लागि सर्टलिष्टमा परेका ५ जनाले बिहीबार कार्ययोजना प्रस्तुत गर्ने भएका छन् । सर्टलिष्टमा परेका ५ जनाले चैत २९ गते (बिहीबार) बोर्डको अध्यक्ष चयन गर्न बनेको सिफरिस समितिसामु आफ्नो कार्ययोजना प्रस्तुत गर्ने भएका हुन् ।

समितिले सर्टलिष्टमा नेपाल धितोपत्र बोर्डका कार्यकारी निर्देशक डा.नवराज अधिकारी, बोर्डकै कार्यकारी निर्देशक मुक्तिनाथ श्रेष्ठ, नेपाल स्टक एक्सचेञ्ज (नेप्से)का सीईओ कृष्ण कार्की, तत्कालीन बीमा समितिका अध्यक्ष चिरञ्जिवी चापागाईं र सन्तोष नारायण श्रेष्ठ रहेका छन् ।

सर्टलिष्टमा छनौट भएका पाँचैजनाको अन्तर्वार्ता तथा कार्ययोजना मूल्यांकनपछि समितिले उत्कृष्ट तीन जनाको नाम मन्त्रिपरिषद्मा सिफारिस गर्नेछ । त्यसपछि मन्त्रिपरिषद्ले ती तीनमध्येबाट उत्कृष्ट एकजनालाई धितोपत्र बोर्डको अध्यक्ष नियुक्त गर्नेछ ।