">
काठमाडौँ । फागुन महिनामा मात्रै करिब ५३ करोड रुपैयाँ सेयर धितो कर्जा प्रवाह भएको छ । नेपाल राष्ट्र बैंकको तथ्यांक अनुसार बैंकिङ प्रणालीबाट ५३ करोड रुपैयाँ सेयर धितो कर्जा प्रवाह भएको हो ।
यो माघ महिनाको तुलनामा भने कम हो । माघमा बैंकहरुले ८८ करोड रुपैयाँ सेयर धितो कर्जा प्रवाह गरेका थिए । तर, तुलनात्मक रुपमा गत आर्थिक वर्षको भन्दा चालु आर्थिक वर्षमा सेयर धितो कर्जा प्रवाह बढेको राष्ट्र बैंकको तथ्यांकले देखाएको छ ।
यसअवधिमा सबैभन्दा धेरै १ करोड रुपैयाँभन्दा बढीको सेयर धितो कर्जा प्रवाह भएको छ । राष्ट्र बैंकका अनुसार चालु आर्थिक वर्षमा यस्तो कर्जा १७.४ प्रतिशतले बढेको छ । असार मसान्तसम्म ४४ अर्ब ७१ करोड रहेको १ करोडमाथिको सेयर धितो कर्जा फागुनसम्ममा ५२ अर्ब ४८ करोड रुपैयाँ पुगेको राष्ट्र बैंकले जनाएको छ ।
त्यस्तै, यसअवधिमा ५० लाखदेखि १ करोडसम्मको कर्जा ३.१ प्रतिशत र २५ देखि ५० लाखसम्मको कर्जा ८.८ प्रतिशतले बढेको राष्ट्र बैंकको तथ्यांकमा उल्लेख छ ।
