काठमाडौँ । नेपाल चार्टर्ड एकाउन्टेन्ट्स संघ (एक्यान)को नवनिर्वाचित कार्य समितिले आर्थिक विधेयक २०८१ को प्रभाव बारे विशेष बहस गर्ने भएको छ । जेठ २१ गते होटल हिमालयमा आयोजना हुन लागेको सो कार्यक्रममा आर्थिक विधेयकले विभिन्न क्षेत्रमा पार्ने प्रभावका बारेमा विशेष बहस हुनेछ ।
दिउँसो ३ बजेदेखि बेलुकी ७ बजेसम्म आयोजना हुन लागेको सो कार्यक्रममा सिए सुदर्शन राज पाण्डे, सिए प्रविन राज काफ्ले, सिए. निकिता अग्रवाल, सिए शेषमणि दाहाल र अधिवक्ता महेश कुमार थापा सम्मिलित प्यानल डिसकसन हुनेछ । कार्यक्रममा सहभागी हुन संघका सदस्यले ३५०० र कर्पोरेट सहभागीहरुले ४५०० शुल्क तिर्नुपर्नेछ ।
‘फर्जी मत’को विवाद भने अझै टुंगिएन
संघको निर्वाचनमा फर्जी मतको विषय उठेको थियो । झन्डै ८० वटा मत फर्जी भएको दाबी संघका सदस्यहरुले गरेपछि उम्मेदवार र सदस्यहरुले सपथ ग्रहण कार्यक्रम नै रोकेर यस विषयमा छानविन गर्न माग गरेका थिए । तर तत्कालीन अध्यक्ष दीपक पाण्डे र वर्तमान अध्यक्ष अरुण राउतले छानविन समिति बनाउने प्रतिबद्धता जनाएर सपथ कार्यक्रम आयोजना भएको थियो । यसैबीच उम्मेदवार रमेश दत्त पाण्डेले उपस्थिति पुस्तिका माग गरी निवेदनसमेत दिएका थिए ।
तर उपस्थिति पुस्तिका दिने काम सूचनाको हक अन्तर्गत नपर्ने भन्दै संघले सो सूचना दिन इन्कार गर्ने विषयमा संघभित्र छलफल भएको छ भने छानविन भएको हकमा फर्जी मत प्रमाणित हुने सम्भावना ठुलो रहेकोले सकेसम्म यो विषयलाई सामसुम पार्नुपर्ने मत अहिलेको कार्यसमितिमा छ ।
यस विषयमा रमेश दत्त पाण्डे अदालत जाने तयारीसमेत गरेका थिए । तर सूचनाको हक अन्तर्गत पहिला सूचना मागौं, त्यसपछि अदालत जाउँ भन्ने कानुन व्यवसायीको सल्लाह अनुसार उनले सो सूचना माग गरेका थिए ।
अदालत गएको खण्डमा अदालतले उपस्थिति पुस्तिका माग गर्न सक्छ । तर, त्यतिबेलासम्म प्रमाण नष्ट हुने सम्भावना बढेको भन्दै संघका सदस्यहरु चिन्तित बनेका छन् ।
यता, छानविन समिति नबनुन्जेल संघको कुनै पनि कार्यक्रममा सहभागी नहुने भन्दै एउटा तप्काले संघका सम्पूर्ण कार्यक्रम बहिष्कार गर्ने भएको छ । ‘फर्जी मत हालिएको विषयमा नजरअन्दाज गरिएको छ । यस्तो कार्यक्रममा कसरी जानु ? हाम्रो टिमले नै बहिष्कार गर्छ ।’ एक सिएले भने, ‘यो विषयमा छानविन हुनैपर्छ ।’
संघ भने छानविन गर्दा गर्दै कार्यकाल सक्ने मनस्थितिमा रहेको ती सिएको तर्क छ ।
