">
काठमाडौँ । वाणिज्य बैंकहरुमा कर्जाको ब्याजदर २ वर्ष यताकै सस्तो भएको छ । नेपाल राष्ट्र बैंकले सार्वजनिक गरेको तथ्याङ्कअनुसार चैतमा बैंकहरुको ब्याजदर २ वर्षयताकै सस्तो भएको हो ।
राष्ट्र बैंकका अनुसार हाल बैंकहरुमा ऋणको औसत ब्याजदर १०.५५ प्रतिशत रहेको छ ।
यसो त यसअघि २०७८ चैतमा बैंकहरुमा कर्जाको ब्याजदर १०.७८ प्रतिशत पुगेको थियो । हाल बैंकहरुमा निक्षेपको ब्याजदर घट्दो क्रममा रहेकाले आगामी महिना कर्जाको ब्याजदर थप घट्ने देखिएको छ । जेठमा १९ मध्ये ८ वाणिज्य बैंकले निक्षेपको ब्याजदर घटाएका छन् भने ८ वाणिज्य बैंकले बैशाख महिनाकै ब्याजदरलाई निरन्तरता दिएका छन् ।
यद्यपी एनआईसी एशियासहित ३ बैंकले भने ब्याजदर बढाएका छन् ।
निक्षेपको ब्याजदर घट्दा लागत घटेर कर्जाको ब्याजदर घट्ने भएकाले बैंकहरुमा निक्षेपको ब्याजदर घटिरहँदा कर्जाको ब्याजदर पनि अझै घट्ने देखिएको छ । हाल बैंकहरुमा निक्षेपको औसत ब्याजदर ६.५१ प्रतिशतमा झरिसकेको छ ।
