काठमाडौँ । नेपाली महिलाहरुको बेचबिखनमा चिनियाँ गिरोह नै सक्रिय रहेको पाइएको छ । केही दिनअघि नेपालबाट नक्कली विवाह गराई चीन पुर्याएर महिलालाई वेश्यावृत्तिमा लगाएको घटना सार्वजनिक भएसँगै यस्तो तथ्य बाहिरिएको हो । 

उक्त घटनामा नुवाकोटको किस्पाङ घर भई हाल चीनमै बस्दै आएकी मनमाया घलेले ५ लाख रुपैयाँमा चिनियाँसँग नक्कली विवाह गराई महिलालाई चीन पुर्याएर वेश्यावृत्तिमा लगाएको भेटिएको थियो । 

पीडित महिलाले दिएको जाहेरीका अनुसार मनमायाले पीडित महिलाको २०७९ चैत १३ गते चिनियाँ नागरिकसँग ‘कोर्ट म्यारिज’ गराइदिएकी थिइन् । त्यसपछि मनमायाले २०८० बैशाख १ गते चीन पुर्याएर वेश्यावृत्तिमा लगाएको भेटिएको थियो । 

पछि पीडित महिलाले आफूलाई जबरजस्ती वेश्यावृत्तिमा लगाएको आफन्तलाई जानकारी गराएपछि बेइजिङस्थित नेपाली दूतावाससँगको समन्वयमा २०८० असार १ गते पीडित महिलाको उद्धार गरिएको थियो । त्यसपश्चात् उक्त घटनाको अनुसन्धान गरिरहेको नेपाल प्रहरीको मानव बेचबिखन अनुसन्धान ब्युरोले मनमाया घलेलाई काठमाडौँबाट पक्राउ गरेको थियो । हाल उनीविरुद्ध अनुसन्धान भइरहेको प्रहरीले जनाएको छ । 

हाल उक्त घटनामा संलग्न चिनियाँ नागरिक फरार छन् । यसरी नेपालबाट विभिन्न प्रलोभनमा पारी नेपाली महिलाहरुलाई चिन पुर्याएर वेश्यावृत्तिमा लगाउने कार्यमा चिनियाँ गिरोह नै सक्रिय रहेको हुनसक्ने अनुमानका आधारमा प्रहरीले थप अनुसन्धान अघि बढाएको छ ।