काठमाडौँ । लामो समयदेखि बिनादर्ता नेपालमा सञ्चालनमा आइरहेको राइड बिजनेश प्लेटफर्म अव भने दर्ता भएको छ । सरकारले औद्योगिक व्यवसाय ऐन, ०७६ संशोधन गर्दै राइड सेयरिङलाई सेवामूलक उद्योगको मान्यता दिएपछि इनड्राइभ नेपालमा दर्ता भएको हो ।
कुल लगानीका रूपमा ५ करोड रुपैयाँ प्रत्यक्ष वैदेशिक लगानी भित्र्याउँदै इनड्राइभ नेपालमा दर्ता भएको हो । प्यानमा दर्तालगायतका करसम्बन्धी प्रक्रिया पनि पूरा गरेर अव कम्पनीले राइडरहरूबाट कमिसन उठाउन सुरु गर्ने जनाएको छ । यद्यपि कमिसन कति भन्ने विषय भने कम्पनीले अझैसम्म खुलाएको छैन ।
कुल ४६ देशका ७४९ सहरमा २० करोड एप डाउनलोड मार्फत झन्डै एक अर्ब व्यक्तिलाई सेवा पुर्याएको दाबी गर्ने कम्पनीले विना दर्ता लामो समयदेखि नेपालमा पनि सेवा दिइरहेको थियो । तर विना दर्ता व्यापार गरेको भन्दै इनड्राइभका विषयमा चर्को आलोचनासमेत भएको थियो ।
