काठमाडौँ । नेकपा एमालेका अध्यक्ष केपी शर्मा ओलीले राजनीतिक क्षणिक स्वार्थ र लाभका लागि गर्नु नहुने बताएका छन् । सुनसरीमा आयोजित एक कार्यक्रमलाई सम्बोधन गर्दै ओलीले यस्तो बताएका हुन् ।
उनले राजनीति देश, जनता र सत्य स्थापनाका लागि हुनुपर्ने बताएका छन् । नेपाली कांग्रेसले संसदमा उपप्रधान एवं गृहमन्त्री रवि लामिछानेमाथि सहकारी ठगीको आरोप लगाउँदै संसद् अवरुद्ध गरिरहेको र एउटा पात्रकाविरुद्ध खनिएको भन्दै आपत्ति जनाएका छन् ।
ओलीले कांग्रेसजस्तो पार्टी रवि लामिछानेको विरुद्धमा खनिनु भनेको भँगेरा मार्न तोप बोकेर जानु सरह भएको टिप्पणी गरेका छन् । उनले लामिछाने राजनीतिमा आएको एक वर्ष भएको र रविले प्रधानमन्त्री बन्नुस् भन्ने कांग्रेसको प्रस्ताव नमानेका कारण कांग्रेसले सहकारी ठगीको आरोप लगाएर बखेडा गरेको आरोप लगाएका छन् ।
त्यस्तै, कान्तिपुर मिडिया ग्रुपका अध्यक्ष कैलाश सिरोहियाको विषयमा बोल्दै प्रहरीले उनलाई नागरिकताको विषयमा पक्राउ गरेको बताए । नागरिकताको मुद्दामा सिरोहिया पक्राउ पर्दा कसरी प्रेस स्वतन्त्रतामाथिको हमला भयो ? भन्दै प्रश्न समेत गरेका छन् । नागरिकताको कुरालाई प्रेस स्वतन्त्रतामाथिको हमलाका रुपमा बुझ्न नहुने ओलीको भनाई छ ।
