काठमाडौँ । नेपाल स्टक एक्सचेञ्ज (नेप्से) को साइट अझै पनि खुलेको छैन । आइतबार कारोबार बन्द हुनुभन्दा केही मिनेटअघि मात्रै डाउन भएको साइट अझै पनि नखुलेको हो ।
कारोबार बन्द हुनुभन्दा (३ बजेअघि) २–३ मिनेटअघि बन्द भएको नेप्सेको साइट यो समाचार तयार पार्दासम्म पनि खुलेको छैन ।
शुक्रबार मौद्रिक नीतिको तेस्रो त्रैमासिक समीक्षा सार्वजनिक भएपछि आइतबार नेप्से परिसूचक ४५.६९ अंकले बढेर २०६४.४५ बिन्दुमा पुगेको छ । नेप्से परिसूचकसँगै आइतबार कारोबार रकम पनि बढेको छ ।
आइतबार नेप्सेमा ३ सय ३२ कम्पनीको ७४ लाख ९ सय १९ कित्ता सेयर खरिदबिक्री हुँदा ५ अर्ब २५ करोडमाथिको सेयर कारोबार भएको छ । बजार बढेकै दिन, अझ ५ अर्ब भन्दा माथिको सेयर कारोबार भएकै दिन नेप्सेको साइट डाउन भएपछि लगानीकर्ता ‘नेप्सेको थोत्रो सिस्टमले ५ अर्ब माथिको कारोबारसमेत धानेन’ भन्दै आक्रोशित बनेका छन् ।
नेप्सेको साइट डाउन भएसँगै अहिले सामाजिक सञ्जालमा लगानीकर्ताहरुले नेप्सेको यही रबैयाका कारण पनि नेपाली सेयर मार्केटमा अर्को स्टक एक्सचेन्ज अपरिहार्य भएको बताएका छन् ।
