">
काठमाडौँ । आगामी आर्थिक वर्ष २०८१/८२ को बजेट ल्याउने तयारी गरेको सरकारलाई सेयर बजारका लगानीकर्ता संघहरुले सेयर बजारमैत्री बजेट ल्याउन सुझाव दिएका छन् । सेयर बजारका ८ लगानीकर्ता संघले संयुक्त प्रेस विज्ञप्ति जारी गर्दै सरकारलाई दुई बुँदे सुझाव दिएका हुन् ।
उनीहरुले हाल विद्यमान प्राकृतिक व्यक्तिको हकमा ३६५ दिनभन्दा बढि अवधि स्वामित्वमा रहेको हितको लाभ रकमको ५ प्रतिशत र ३६५ दिन वा सो भन्दा कम अवधि स्वामित्वमा रहेको हितको लाभ रकम ७.५ प्रतिशत अग्रिम कर असुल गर्नुपर्ने व्यवस्था परिवर्तन गर्न माग गरेका छन् ।
उनीहरुले उक्त व्यवस्थामा परिवर्तन गर्दै अग्रिम कर नभई उक्त कर अन्तिम करकट्टी हुने कानूनी व्यवस्था गर्न र आयकर ऐनको अनुसूची समेत संशोधन गर्न माग गरेका छन् ।
त्यस्तै, लगानीकर्ता संघहरुले अल्पकालीन लगानीकर्ताको हकमा ५ प्रतिशत र दीर्घकालीन लगानीकर्ताको हकमा ३ प्रतिशत पूँजीगत लाभकर कायम हुनुपर्ने पनि माग गरेका छन् । जसका कारण सेयर बजारमा लगानीकर्ताको मनोबल उच्च हुन गई कारोबार रकम बढ्ने र सरकारलाई बढी लाभकर प्राप्त हुने लगानीकर्ता संघहरुले बताएका छन् ।
उक्त संयुक्त विज्ञप्तिमा नेपाल इन्भेष्टर्स फोरम, सेयर लगानीकर्ता संघ नेपाल, नेपाल पूँजीबजार लगानीकर्ता संघ, जनरल इन्भेष्टर एसोसियसन, नेपाल सेयरधनी संघ, स्वतन्त्र पूँजीबजार सुधार संघ, नेपाल धितोपत्र लगानीकर्ता संघ र साधारण लगानीकर्ता संघ नेपालले ऐक्यबद्धता जनाएका छन् ।
