काठमाडौँ । सरकारले आगामी आर्थिक वर्षको बजेटमार्फत सरकारी कर्मचारीको तलबभत्ता नबढाउने भएको छ । वित्तीय स्रोतको अभावका कारण आगामी आर्थिक वर्ष २०८१/८२ मा सरकारी कर्मचारीको  तलबभत्ता नबढ्ने भएको हो । 

यसपालि सरकारी कर्मचारीको तलबभत्ता बढाउनैपर्ने कानूनी बाध्यता पनि नरहेको र वित्तीय स्रोतको अभाव भएकाले पनि कर्मचारीको तलबभत्ता वृद्धि नगरिने अर्थ मन्त्रालय स्रोतले बताएको छ ।

दुई वर्षअघि सरकारले २०७९ सालमा सरकारी कर्मचारीको तलबभत्ता पुनरावलोकन गरेको हुनाले पनि यसवर्ष तलबभत्ता बढाउनैपर्ने बाध्यतामा सरकार छैन । त्यसैमाथि वित्तीय स्रोतसमेत अभाव भइरहेका बेला सरकार आर्थिक दायित्व बढाउने मनसायमा पनि देखिएको छैन ।

यही कारण पनि आगामी आर्थिक वर्षमा सरकारले कर्मचारीको तलबभत्तामा कुनै परिवर्तन नगर्ने पक्का छ ।