काठमाडौँ । असार महिनामा १९ मध्ये ११ वाणिज्य बैंकहरुले ब्याजदर घटाएका छन् । असार महिनाका लागि नयाँ ब्याजदर प्रकाशित गर्दै ११ वाणिज्य बैंकहरुले जेठ महिनाको तुलनामा असारको ब्याजदर घटाएका हुन् । योसँगै असारमा वाणिज्य बैंकहरुमा व्यक्तिगत मुद्दती निक्षेपको ब्याजदर औषतमा ०.१२ प्रतिशतबिन्दु र संस्थागततर्फ ०.१३ प्रतिशतबिन्दुले घटेको छ ।
ब्याजदर घटाउनेमा सबैभन्दा अगाडि ग्लोबल आइएमई बैंक रहेको छ । बैंकले असार महिनामा मुद्दती निक्षेपको ब्याजदर सर्वाधिक १ प्रतिशतबिन्दुले घटाएको छ ।
त्यस्तै, ब्याजदर घटाउनेमा एभरेष्ट बैंक, राष्ट्रिय वाणिज्य बैंक, नेपाल एसबिआई बैंक, लक्ष्मी सनराइज बैंक, प्राइम कमर्सियल बैंक, कुमारी बैंक, सानिमा बैंक, सिटिजन्स बैंक इन्टरनेशनल, एनएमबी बैंक, स्ट्यान्डर्ड चार्टर्ड बैंक र एनआईसी एशिया बैंक रहेका छन् ।
३ बैंकको ब्याजदर बढ्यो
यता असारमा ११ वाणिज्य बैंकहरुले निक्षेपको ब्याजदर घटाउँदा तीन वाणिज्य बैंकले भने ब्याजदर बढाएका छन् । ब्याजदर बढाउनेमा माछापुच्छ्रे बैंक, हिमालयन बैंक र नबिल बैंक रहेका छन् । जसमध्ये असारमा सबैभन्दा धेरै ब्याजदर हिमालयन बैंकले बढाएको छ । बैंकले असारमा व्यक्तिगत मुद्दती निक्षेपमा ०.७५ र संस्थागत मुद्दती निक्षेपमा १ प्रतिशतबिन्दुले ब्याजदर बढाएको छ ।
त्यस्तै, असारमा कृषि विकास बैंक, नेपाल बैंक लिमिटेड, सिद्धार्थ बैंक, नेपाल इन्भेष्टमेन्ट मेगा बैंक र प्रभु बैंकले भने जेठ महिनाकै ब्याजदरलाई निरन्तरता दिने भएका छन् ।
