काठमाडौँ । तत्कालीन सेञ्चुरी कमर्सियल बैंकबाट ऋण प्रवाह गर्दा अनियमितता गरेको आरोपमा थप एक जना पक्राउ परेका छन् । प्रहरीको केन्द्रीय अनुसन्धान ब्युरो (सीआईबी)ले अभिषेक बज्राचार्यलाई पक्राउ गरेको हो ।

बैंकबाट ऋण प्रवाह गर्दा भएको अनियमिततामा संलग्नता देखिएपछि बज्राचार्यलाई धरानबाट पक्राउ गरिएको सीआईबीका एक अधिकारीले पुष्टि गरेका छन् ।

यसअघि सोमबार सीआईबीले ठगी मुद्दाको अनुसन्धानका लागि भन्दै सेञ्चुरी कमर्सियल बैंकका तत्कालीन अध्यक्ष राजेश श्रेष्ठ, सुनिलकुमार न्यौपाने, प्रा.डा. गीता प्रधान, रमेश कुमार निरौला, रणबहादुर श्रेष्ठ, राजेश कुमार दली, उमाकुमारी श्रेष्ठ र शिवगोपाल रिसाललाई पक्राउ गरेको थियो ।

पक्राउ परेकाहरुमाथि थप अनुसन्धान भइरहेको प्रहरीले जनाएको छ । उनीहरुमाथि बैंकमा कमसल धितोमा कर्जा प्रवाह गरेको आरोप रहेको छ ।

सीआईबीले सोही प्रकरणमा गत फागुन १५ गते कमसल धितोमा कर्जा प्रवाह गरेको आरोपमा सेन्चुरी बैंकका सीईओ मनोज न्यौपानेसहित अन्य कर्मचारी पक्राउ परेका थिए । उनीहरूले सेन्चुरी बैंकमा रहँदा धितो भन्दा ९७ करोड ४१ लाख ७० हजार ७ सय ७२ रुपैयाँ बढी कर्जा प्रवाह गरेको सीआईबीले जनाएको थियो । उनीहरु चैत १ गते हाजिर जमानीमा छुटेका थिए ।