काठमाडौँ । नेपाली फिल्म इन्डस्ट्रिका नायक कविर खड्का सेयर बजारमा पनि लगानी गर्छन् । पछिल्लो समय युवा वर्गमा आफ्नो छुट्टै पहिचान बनाएका कविर फिल्मजस्तै सेयर बजारलाई पनि प्राथामिकता दिन्छन् ।
सानैबाट सेयर बजारप्रति चासो राख्ने हर्सद मेहेताको ‘स्क्याम १९९२’ फिल्म हेरेपछि बजारप्रति झनै प्रभावित भएको कविरले बताएका छन् । अर्थ सरोकार पोडकास्टमा बोल्दै उनले पत्रिकामा देखिने सेयर बजारसम्बन्धी समाचारबाट बजारप्रति आकर्षित भएको र पछि हर्सद मेहेताको ‘स्क्याम १९९२’ पछि बजार प्रवेश गरेको बताए ।
बजार प्रवेश गर्दा बजारबारे खासै धेरै जानकारी नभएकाले सुरुमा बजारमा राम्रै घाटा खानुपरेको कविरले बताएका छन् । अझ आफ्नै साथीले बजारमा टोपी लगाइदिएपछि डिप्रेसनमै गएको उनी बताउँछन् ।
बजारमा लगानी गरेको सबै लगानी डुबेपछि आत्तिएर ज्योतिषलाई हेराउन गएको पनि कविरले बताएका छन् । ‘सुरुमा बजारमा लगानी गर्दा नजानेर अझ आफ्नै गल्तीले सबै लगानी डुबाएँ । अझ आफ्नै साथीले टोपी लगाइदिएपछि त डिप्रेसनमै पुगेँ ।’, उनले भने, ‘लगानी गरेको सबै पैसा डुबेपछि पण्डितकोमा पनि पुगेँ । ग्रहदशा बिग्रेको पनि हेराएँ । अहिले जे होस् ठिक छ । मेरो लागि बजार फापेको छ अहिले ।’
त्यस्तै, पछिल्लो समय ‘लण्डन टू पेरिस’ फिल्मको मुख्य भूमिकामा रहेका कविर फिल्म निर्माण तथा प्रमोसनमा व्यस्त छन् । यद्यपि शुटिङ्गको समयमा पनि सेयर बजार हेर्ने र कारोबार गर्ने गरेको उनले बताएका छन् । नेपाली फिल्म इन्डस्ट्रि, सेयर बजार र बजार यात्राबारे नायक करिब खड्कासँग गरिएको थप कुराकानी भिडियोमा हेर्नुहोस्ः
